Россий президентын темлымашыж почеш илышыш шыҥдаралтше «Оласе средам йӧнаным ыштымаш» федеральный проект дене келшышын, кызыт граждан-влак тӱзатышаш кумдык верч онлайн йӱклат.
Проект кузе шукталтмым Россий Федерацийыште региональный вияҥмаш шотышто правительственный комиссийын президиумжын (штабын) заседанийыштыже каҥашеныт. Тушко Марий Эл вуйлатыше Юрий Зайцеват ушнен. Заседанийым Россий правительстве вуйлатышын алмаштышыже Марат Хуснуллин вӱден.
Йӱклымаш 31 май марте шуйна. Марий Элыште тӱзатышаш кумдык-влакым кум муниципальный образованийыште палемдыме: Йошкар-Олаште – 9, Волжскышто – 7 да Медведево посёлкышто – 5.
Тачысе кечылан республикыште илыше 20 тӱжем утла еҥ йӱклен.
Марий Элыште тений тӱшка верлам да кудывечылам тӱзаташ 192 миллион наре теҥге окса ойыралтеш. 78 объект шотышто контрактым пеҥгыдемдыме, визытыштыже паша мучашлалтын.
Ты проект кудывечылам да каныш верлам тӱзаташ, республикнам эшеат сылныракым ышташ йӧным пуа, палемден Марий Эл вуйлатыше.
Марий Эл Республикым вуйлатышын администрацийжын информаций паша шотышто пӧлкажын уверже негызеш Л.СЕМЕНОВА ямдылен
