Звенигово районысо Кокшайск ял шотан илем администраций Верысе тӱҥалтыш-влакын проектыштым илышыш пуртымо шотышто республиканский программыште чолган участвоватла. Тудын полшымыж дене кумдыкысо шым ял гыч визытыштыже электровийым аныклыше светильникым сакен.
Шуйка посёлкышто илыше калыкат июль тӱҥалтыште эртарыме погынымаште уремым пычкемыш жапыште сайын волгалтараш кӱлмӧ йодышым тарватен. Кызыт илемыште улшо чумыр понар гыч 70 процентше чот тоштемын, тудыжат, манмыла, тыште-тушто веле йӱла. Тидымак шотыш налын, верысе-влак тошто понарым электровийым аныклыше светильник дене вашталташ кутырен келшеныт. Ныл еҥан инициативный группышт тиде йодыш дене Кокшайск ял шотан администрацийыш миенат шуын.
Кызыт администраций «Модернизация уличного освещения в п.Шуйка» проектым 2021 ийыште Верысе тӱҥалтыш-влакын проектыштым илышыш пуртымо шотышто республиканский проектыш пурташлан документым ямдыла.
М.ИВАНОВА
