13 июньышто Йошкар-Олаште, Мер-политике рӱдерыште, Марий Эл вуйлатышын пашажым жаплан шуктышо Александр Евстифеев общественность дене вашлие. Тудо лишыл 5 ий жапыште республикым вияҥдышаш программыже да палемдыме задаче-влак дене палдарыш.
Тудым колыштмеке, еҥ-влакын сай ончыкылыклан ӱшанышт эшеат кугеме, очыни. Молан манаш гын кызыт республикыштына могай сферыште нелылык уло гын, кажныжым раш палемдыш да нуным рашемдаш шонымыж нерген каласыш. А тиде – корным тӧрлатыман; республикын окса парымжым петырыман; автовокзал ден аэропорт шот дене пашам ыштышаш улыт; кӱртньыгорным шуйыман; шӧр производствым вияҥдыман да шӧр сатум ужалаш кугу рынкыш лекман; у паша вер-влакым ыштыман; экотуризмым вияҥдыман; коррупцийым пытарыман; наций-влак кокласе тыныслыкым аралыман да икмыняр молат.
— Нефть ден газна уке манын ӧпкелен шинчаш огына тӱҥал. Мемнан ресурсна эшеат сайрак – нуно уэш вияҥден колташ лийше (возобновляемые) улыт, – каласыш А.Евстифеев. – Нелылык кид велалташ амал огыл. Тудо шокшым кергалтен пашам ышташ таратышаш.
Тудо вашлиймаш тӱҥалтыштак палемдыш:
— Российын президентше Владимир Путин мыйын ончылан Марий Элыште социально-экономический положенийым саемдаш задачым шынден. Тышке шушашлан мылам веле огыл, чылаланнат тыршен пашам ыштыман.
Тыгак палдарыш: нелылык-влак нерген палышашлан кучем обществе дене вашлийын мутланаш шона.
Пашалан чолган пижаш, нелылык-влакым кораҥдаш шонымыжым республикыште илыше-влак сайлан шотлат. Марий Элын икымше президентше В.Зотин тыге палемдыш:
— Тыланда еҥ-влак ӱшанат. А республикын потенциалже моткоч кугу, калык — пашаче. Палемдыме шонымашда-влакым илышыш пуртен кертыда гын, те герой лийыда! Мый Тендан верч улам!
А.Евстифеевын ыштен кертшашыжлан ӱшанымышт нерген Марий Эл Кугыжаныш Погын председательын икымше алмаштышыже В.Мухин, Йошкар-Оласе йоча эмлымверын тӱҥ врачше Л.Соколова, ОНФ-ын сопредседательже А.Кузнецов ойлышт. Пытартышыже, мутлан, диалогым ыштышашлан Александр Евстифеевым поддержатлыше штабым ышташ темлыш.
Любовь Камалетдинова.
