УВЕР ЙОГЫН

Поро кумыллан – кумда корным

Коммерческий огыл организаций, волонтёр толкын, бизнес да медиа алан-влакын еҥышт кокла гыч лидер-шамычым рашемдаш, тыгак социальный тӱҥалтышлан полшаш манын, тений 16 мартыште #МеПырляУлына тӱнямбал премийлан стартым пуымо.

Премийын призёржо-шамыч проектыштым илышыш пурташ 3,5 миллион теҥге марте грантым налыт.

Премийын участникше Россий Федерацийын 14 ияш деч кугурак, волонтёрлан, коммерческий огыл организацийын, медиа аланын, коммерческий организацийын еҥжылан шотлалтше чыла граждан лийын кертеш.

Конкурс отбор тыгай номинаций-влак дене эртаралтеш:

«Калыклан полыш» («Помощь людям») – лушкыдылан шотлалтше еҥ-влакын илышыштым саемдымашке, калыклан социальный полышым пуымашке, тыгак калык ден кумдыклам чрезвычайный ситуаций деч аралымашке, еҥ-влакым кычалмашке да калык коклаште лӱдыкшыдымылык культурым чапландарен шаркалымашке виктаралтше проект-шамыч.

«Калыкын тазалыкше» («Здоровье нации») – психический да физический тазалык, донорство, тазалык аралтышым, физкультур ден спортым вияҥдыме, тыгак таза илыш-йӱлам аклаш кумылаҥдыме аланыште проект-влак.

«Йӧным пуышо эл» («Страна возможностей») – посна айдемын усталыкшым рашемдымашке, тудым воспитатлымашке, образованийым, поро кумыл толкыным, патриотизмым, тӱвыра ден йӱлам вияҥдымашке, историийым арален кодымашке виктаралтше проект-влак.

«Илаш келшыше кумдык» («Территория для жизни») – Российысе регион-влакым, оласе кумдык ден социальный инфраструктурым, туризмым вияҥдымашке, тыгак йырвел кумдык ден экологийым, янлык-шамыч ден нунын праваштым арален кодымашке виктаралтше проект-влак.

«Кугу перемен» («Большая перемена») – 14 гыч 17 ияш марте граждан-влакын илышыш пуртымо волонтёр проектышт.

«Социальный вашталтышын ончылъеҥже» (Лидер социальных изменений») – организаций-влакын кужу жаплан ямдылыме социально кӱлешан системный программышт.

«Ответственный бизнес» – бизнесын илышыш пуртымо социально кӱлешан отраслевой проектышт.

«Социальный амалкалче» («Социальный предприниматель») – социальный предприятий статусан МСП субъект-влакын участникыштын илышыш пуртымо социально кӱлешан проектышт.  

«Медиапроект» – медиа аланыште социально кӱлешан проект-влак.

Премий 2022 ий 16 март гыч 5 декабрь марте ныл йыжыҥ (йодмашым пуымо, регион кӱкшытыштӧ, пелефинал, финал) дене эртаралтеш.

Сеҥыше-влакым тений декабрьыште #МеПырляУлына тӱнямбал форум кышкарыште увертарат да премий дене палемдат.

Премийыште участвоватлаш шонымо нерген йодмашым 12 июнь марте пуыман, илышыш пурташ палемдыме проект дене кӱчыкын палдарыман да конкурслык материалым вераҥдыман. Участник-шамычым Премийын  https://премия.мывместе.рф/ порталыштыже регистрироватлат.

2021 ийыште Марий Эл гыч кок номинант: Волжск оласе 4-ше №-ан школышто тунемше, «Пиалан билет» волонтёр отрядын участникше-шамыч Дарья Пупкина ден Ярослав Егоров (снимкыште улыт), премийым налыныт. Нунын проектышт инвалид йоча-влакын социальный адаптацийышт дене кылдалтын.

М.ИВАНОВА

Опубликовать в Одноклассники

Добавить комментарий