Энергетике – Сеҥымашлан
Монументлан – у тӱсым
Тӧрленыт, тӱзатеныт, волгалтареныт
Кугу Отечественный сарыште сеҥымылан 80 ий темме вашеш «Рӱдӧ да Юл кундем Россеть» ПАО-н «Мариэнерго» филиалжын латик РЭС-шын пашаеҥже-влак сареш вуйым пыштыше-влаклан республик мучко 15 монументым шотыш конденыт.
Лӱмгече вашеш энергетик-влак памятникла воктене тул волгыдым ыштеныт, обелисклам тӧрленыт, монумент-влакын негызыштым штукатуритленыт, куштырам да кодшо ийысе лышташым погкаленыт, воктенысе бордюр ден теҥгыллам чиялтеныт, печылам уэмденыт. Тыге нине объект-влакын кӱлешан улмыштым пеҥгыдемденыт.
«Мариэнерго» филиалын пашаеҥже-влак тыгай сомылым кажне районышто да ий еда шуктат. Тений Волжскышто Сеҥымаш рӱдӧ паркыште лампылам вераҥденыт да тидлан СИП воштырым кучылтыныт. Юрино посёлкышто Воин чап скверым волгалтареныт, Килемар посёлкышто «Фронтыш кайыше-влаклан» у памятник воктене кандаш лампым сакеныт. Советский районысо Кужмарий селаште монументым тӧрленыт да сарыш кайыше-влакын лӱмыштым ончыктеныт.
Энергетик-влак тыгак Кугу Отечественный сарыште колышо-влаклан обелисклам да тусо кундемым Оршанке район Отар ялыште да Оршанке посёлкышто, Волжский район Учимсола, Звенигово район Кукшэҥер, Марий Турек район Марий Озармаш, Морко район Кораксола, Параньга район Матародо, Медведево район Пекшиксола, Шернур район Нольыкмарий да Чылдемыр яллаште, Кужэҥер район Йӱледӱр селаште тӱзатеныт.
9 Майыште энергетик-влак памятникла воктеке пеледышым пыштат да минут жаплан, шып лийын, вуйыштым савалтат.
«Эрыкна верч илышыштым пуышо-влакым шарныктарыше памятник ден монументлам арален кодымашке надырым пыштымына дене кугешнена. Нуным тӱзатымым ме порыс семын ончена», – палемден «Мариэнерго» филиалын директоржо Сергей Хлусов.
Юрий ИСАКОВ.
Снимкыште: Пекшиксолаште обелискым ачалыме да кундемым тӱзатыме.
Фотом «Мариэнергон» пресс-службыж деч налме.
