Марий Эл вуйлатыше Юрий Зайцевын кӱштымыж почеш Козьмодемьянскын рӱдыштыжӧ социальный обслуживаний да паша верым ситарыме шотышто организаций-влаклан йӧнан верым ойырымо. Тидлан Комсомольский уремысе ончычсо поликлиникын оралтыже келшен толын.
Республик вуйлатышын эртарыме совещанийыште Марий Эл паша да социальный аралтыш министр Марина Островская палемден: Козьмодемьянскыште министерствын ведомствыштыже шотлалтше вич учреждений пашам ышта. Нине учрежденийлаште Козьмодемьянск олаште да Курыкмарий районышто илыше-влаклан 20 тӱжем утла социальный да кугыжаныш услуго комплексно пуалтеш. Но зданий-влакым санитарный да пожар ваштареш лӱдыкшымылык шотышто законодательствын кызытсе йодмашыжлан келыштараш ок лий, тыгак еҥ полыш деч посна коштын кертдыме-влаклан ты верлашке логалаш йӧн уке. Оралте-влакым ондак чоҥымо ойыртемже тыгай.
Сандене социальный обслуживаний да паша верым ситарыме шотышто учреждений-влакым яра шогышо ончычсо поликлиникыш кусараш пунчалме.
Зданийын кумдыкшо – 1148,3 кв.метр, тудым капитально олмыкташ, мебельым да оборудованийым налаш, тыштак черле еҥым кужу жап ончымо системе школым вераҥдаш ешартыш кабинет-влакым ямдылаш палемдыме.
Марий Эл Республик вуйлатышын
пресс-службыжын уверже негызеш
Л.СЕМЕНОВА ямдылен
Д.Речкинын фотожо
