УВЕР ЙОГЫН

«Эрвел марий» вес пайремлан ямдылалтеш

14 гыч 16 сентябрь марте Саратовышто «Вместе мы – Россия» всероссийский IV фестиваль жапыште «Волжские просторы» национальный культур этнофестиваль эртен. 

Тушто Башкортостан, Удмуртий, Мордовий, Татарстан республикла, Пермь кундем, Оренбург, Волгоград, Киров, Самара, Ульяновск, Саратов да Нижегородский областьла гыч усталык коллектив-влак мастарлыкым ончыктеныт. Марий Элын чапшым Россий Федераций калык усталыкын сулло коллективше лӱмым нумалше, мурышо да куштышо «Эрвел марий» ансамбль арален.

— Мероприятийым торжественно почмаш 15 сентябрьыште «Саратов областьысе калык-влакын национальный ялышт» лӱман этнографий комплексыште эртен. Ялын кудывечылаштыже фестивальын участникше-влак шке калык йӱлашт, мурышт, куштымашышт дене палдареныт. Тиде кечынак олан Театральный площадьыштыже фестивальын гала-концертше эртен, — палдарыш «Эрвел марий» ансамбльын концертмейстерже Борис Дмитриев.

Этнофестиваль гыч ты коллектив кумшо степенян диплом дене пӧртылын.

А кызыт «Эрвел марий» ансамбль Беларусь ден Россий регион-влакын V форумышт жапыште эртыше «Содружество традиций» сымыктыш пайремыш каяш ямдылалтеш. Тудо 11-12 октябрьыште Могилёв олаште эрта.

А.Байкова.

(Фотом Республикысе калык усталык да тӱвыра ден каныме паша шотышто шанче-методике рӱдерын сайтше гыч налме.)

Снимкыште: «Эрвел марий» Татарстан кундемысе «Умырзая» татар фольклор ансамбль дене пырля.

Опубликовать в Одноклассники

Добавить комментарий