Тиде чолга марий рвезын Россий кӱкшытан конкурсын финалышкыже лекме нерген уверым колмеке, тудын верч моткоч куанышым. Молан манаш гын, «Флагманы образования» конкурс – «Россий –йӧным пуышо эл» президент платформын проектше. Тудо талантан педагог-влаклан кугу шӱкалтышым пуа, тугеже тушто вийым тергыме у кӱкшытым налаш полша. Ӱшанена, Никита ПЧЁЛКИНЫН илышыштыже тиде конкурс тошкалтыш дене кӱшкырак кӱзашыже йӧным ышта.
– Никита, тыйым Россий кӱкшытан конкурсын финалышкыже лекмет дене саламлем. Конкурсыш ушнаш шонымаш кузерак лектын, финалыш логалаш манын, могай шоктем эртенат палыме шуэш ыле. Тидын нерген радамлын каласкален кертат?
– Конкурсыш «У школ» вияҥдыме рӱдерыште вуйлатышем, наставникем Ринат Сергеевич Анисимовлан кӧра ушненам. Тудо рӱдерым вияҥдымашке кугу надырым пыштен, мыйым эреак шӱкен шога. Тунемше икшыве-влакын тӱнямбал, Россий кӱкшытан конкурслашке ушнымышт, призёр радамыш логалмышт, сеҥымашышт куандарат, профессионал семын кушкаш вийым пуат. Мыят нунылан пример лияш тыршем, садланак, очыни, «Флагманы образования» конкурсышто вием тергаш шонен пыштенам.
Регистрацийже эше февральыштак тӱҥалын да август марте шуйнен. Тӱҥалтыште педагогике, психологий дене кылдалтше тестирований лийын. Сентябрыште тудым иктешленыт, 12 тӱжем утла студент гыч кумшӱдым гына ойыреныт. Мыят нунын коклаш логалынам. Финал 7-10 октябрьыште Волгоградыште эрта. Таҥасымаш-влак командыште да индивидуальный лийыт. Тылеч посна тӱрлӧ мутланыме площадке, «йыргешке ӱстел», профессиональный ден творческий мастерской пашам ышташ тӱҥалыт. Финалым моткоч вучем, кумыл нӧлтшӧ. Ала-мом уым пален налме, у еҥ-шамыч дене палыме лийме шуэш. А конкурслык заданийым мыланна ончылгоч огыт ойло. Нуным мыланна тушко мийымеке гына ончыктат.
– «Флагманы образования» конкурс деч посна, эше кушто виет тергенат?
– «Worldskills» IV отборочный чемпионатыште Марий кугыжаныш университетыште кокымшо вер дене палемдалтынам. «iВолга» форумышто проектем дене Юл кундем федерал округын финалышкыже лектынам. Тунемшем-влак scratch программирований йылме дене тӱнямбал олимпиадыште Юл кундем федерал округ коклаште призёрыш логалыныт, а Российыште шымше лийыныт. «Поиск юных-2024» республикысе конкурсышто тунемшем икымше верым налын.
– Илышет педагогике дене кылденат. Икшыве дене пашам ышташ кугу моштымаш, йӧратымаш, чытымаш кӱлыт. Тиде профессийым тый чон йодмо почеш ойыренат але..?
– Туныктышо лияш эше школышто тунемме годымак шоненам. Йошкар-Оласе 2-шо №-ан школым тунем пытарымеке, Марий кугыжаныш университетыште информатике ден цифровой технологий специальность дене шинчымашым погенам. Тений дипломым кидыш налынам. Икшыве-шамыч дене пашам ышташ мылам, очыни, пӱралтын, молан манаш гын ешыштына туныктышо икмыняр лийын. Авам Аида Павловна – педагог тукым гыч. Тудо шкеже университетым йошкар диплом дене пытарен, Чавайн лӱмеш книгагудышто библиографлан пашам ышта, садлан книга дене кылым эреак кученам. Ачамат Сергей Александрович икмыняр жап Палантай лӱмеш тӱвыра да сымыктыш колледжыште туныктышылан ыштен, студент-влакым шӱвырым, гармоньым шокташ туныктен.
Икмыняр ий вожатыйлан, воспитательлан Марий Элысе, Татарстанысе йоча лагерьлаште тыршенам. Диджей, педагог-организатор лийынам. Кызыт мый «У школ» вияҥдыме рӱдерыште scratch йылме дене йоча-шамычым робототехнике ден программированийым туныктем. Вӱдышӧ туныктышо улам. Икшыве-шамыч дене пашам ышташ, нунылан у шинчымашым пуаш, у деч у кӱкшытым налмыштым ончаш моткочак келша. Пашам кумылем вӱчка, вет йоча-влакын сеҥымашыштым ужын, шкежат нунын верч куанет. Садлан педагогике – чон йодмо сомылем манын шонем.
– Тунемат, пашам ыштет, тӱрлӧ конкурсышто виет тергет. Чыла вере шукташ манын, шуко вийым пыштыман. Нойымаш ок шижалт?
– Йӧршынат уке. Ӱнарым ешем, ача-авам, йӧратыме ӱдырем, йолташем, тунемшем-влак пуат. Самырык годым чыла ыштен шуктыман. Кызыт мый эше МарГУ-што магистратурышто робототехнике, предпринимательстве, технический образованийыште дизайн специальность дене тунемам. Тыгак ты вузыштак лаборант ден преподавательын ассистентше улам. Икманаш, илыш шолеш.
А чон ласкалыкым мылам лишыл еҥем-влак пуат. Ачамын, республикыштына кумдан палыме уста музыкант Сергей Александрович Пчёлкинын, баян дене шокталтымыже нойымем ӱштылеш. Мый шкежат икмыняр семӱзгар дене шоктем. Тылеч посна мончаш кошташ йӧратем. Тушто капемат, чонемат каналта. Тыгак тӱрлӧ кундемым ончен коштмат перезагрузко манметым ышта. Эше мылам кочкышым ямдылаш келша. Шкемым педагогикыште ом му гын, очыни, шеф-повар лиям ыле.
– Никита, чоным почын вашмутым пуыметлан пеш кугу тау. Конкурсышто шкем сайын ончыкташ да сеҥымашке шуаш тыланем!
– Тау.
Лидия ШАБДАРОВА
Фотом еш альбом гыч налме
