КУЛЬТУР ДА ИСКУССТВО СЫМЫКТЫШ

«Шонымашке шуаш лӱдман огыл»

И.С.Палантай лӱмеш тӱвыра да сымыктыш колледж пелен «Фортепианные витражи» клуб ятыр ий пашам ышта. Тудым ик жап Нина Яналова вуйлатен, а кызыт ты сомылым Татьяна Тихоновалан ӱшаненыт.

Клубышто музык да искусство тӱняште палыме да лӱмлӧ еҥ, самырык музыкант да чолга коллектив-влак дене вашлиймашым эртарат. Кодшо кечылаште Татьяна Васильевна колледжын академический музык факультетшын тунемшыже Егор Карпочев дене вашлиймашым эртарыш. Тушко ты тунемме верын студентше ден преподавательже, колледжын тунемшыже да искусствылан шӱман еҥ-влак ятырынак погыненыт.

Е.Карпочев «Фортепиано» отделенийын студентше, IV курсышто тунемеш. Вашлиймаште семӱзгар воктене шкенжым моткоч ӱшанлын кучыш, йодыш-влакланат кумылын вашештыш. Самырык музыкантын «Этюд» (К.Черни), «Грёзы любви» (Ф.Лист), «Экспромт» (Р.Шуберт), «Юмореска» (С.Рахманинов) шоктымо произведенийлажым шокшын вашлийыч, икмыняр гана «Браво!» манынат тауштышт.

Егор – Йошкар-Ола гыч. Изинекак музыклан шӱман кушкын. Тидым аваже шижын шуктен да П.Чайковский лӱмеш йоча искусство школыш тунемаш наҥгаяш шонен пыштен.

Но ала-могай амаллан кӧра икымше сентябрь деч ончыч тушко каяш тореш лийынам, – шарналта Егор. – Арня шонен коштмеке, шонымашем вашталтын да авам дене уэш сымыктыш школыш кайышна. Пиалешем, ончычсо педагогем Лариса Геннадьевна Хуколенком вашлийынна. Тудын классыштыже тунемше-влак шукын лийыныт гынат, мыйым нальыч. Куд ий тудын дене мастарлыкым шуаренам, а вара вес педагог Марина Алексеевна Типикина деке кусненам.

Йоча сымыктыш школышто 8 классым тунем лекмеке, Е.Карпочев музыкальный училище пеленысе школыш Алла Валентиновна Смирнован классышкыже тунемаш пурен. Варажым И.С.Палантай лӱмеш колледжыштат тудын классышкыжак логалын.

Егор кажне занятийыш йӧратен коштеш. Туныктышыжо Алла Валентиновна семын мастар музыкант лияш манын, яра жапыштат, фортепиано воктеке шинчын, кум-ныл шагат дене паҥгалам темдыштеш. Тыршымыже арам огыл: республикысе веле огыл, регион-влак кокласе, Россий кӱкшытан конкурслашке ушна, сеҥыше-влак радамыш лектеш.

Сценыш лекме годым шукышт тургыжланат, ойгырат. Тидын шотышто, нимом шылтыде, Егор Карпочев тыгерак ойлыш:

Тӱҥалтыш курслаште тургыжланенам, эсогыл парнямат чытырен, но жап эртыме семын, тидым сеҥаш тунемынам. Семӱзгар воктеке шичмеке, ушем дене семӱзгарым чын шоктымо нерген веле шонем. Эн тӱҥжӧ колыштшо, ончышо деке произведенийым чын намиен шуктымо нерген шонем.

Самырык музыкантын репертуарже тӱрлӧ музыклан поян, поснак С.Рахманиновын произведенийжым шокташ йӧрата. А марий композитор-влак кокла гыч Андрей Эшпайын, Анатолий Лупповын, Кузьма Смирновын музыкыштым шокташ кумылан.

Сергей Рахманиновын возымыжым умылаш куштылгырак, – чонжым почо самырык музыкант. – А колыштмо шотышто посна нигӧм ойырен ом каласе, сай музыкальный произведенийым колыштам.

Колледж деч вара кӱшыл шинчымашым налаш Санкт-Петербургыш, Москош каяш шонен улмаш, но тӱрлӧ амаллан кӧра Озаҥ консерваторийым ойырен налын.

Рвезе шонымашкыже шуаш тыршыше. Тидыже мутланыме годым сайынак шижалте. Тудо кажне йодышлан шонен-шонен вашештыш.

Тӱрлӧ урок-влак улыт: «Композиций», «Сольфеджио», «Гармоний». Нуным кӱлешанлан шотлет? – зал гыч шоктыш йодыш.

Кажныштыже могай-гынат у шинчымашым налам, сандене педагог-влакым эреак тӱткын колыштам. А нине урок-влак ушым пойдарат, тӱняумылымашым кумдаҥдаш полшат, – лие вашмут.

Изинекак музыкым йӧратыше рвезе мастарлыкшым тӱрлӧ семын шуараш тырша, книгам лудеш, чапланыше композитор-влакын произведенийыштым колыштеш. Профессионал искусствышто кушкаш Егорлан Российысе Талантан икшыве-влаклан полышым пуышо «Сириус» туныктымо рӱдерыште кок гана лиймыже полшен.

2016 ийыште йодмашым колтен онченам, налыныт. Тушто кумло наре кече лийынам, тӱрлӧ преподаватель дене занятий-влак оҥайын эртеныт. Уш-акылым пойдарыме веле огыл, каныме шотан мероприятий-влакат пайдале лийыныт, – порын шарналта тунамсе пагытшым студент. – Икымше сменыште специальность дене Санкт-Петербург гыч Российын сулло артистше Владимир Мищук урокым пуэн, кокымшышто – Олег Вайнштейн, а кумшо сменыште Российын сулло артистше Андрей Диев дене тунемаш куанле ыле. Композиций дене Россий искусствын сулло деятельже Игорь Рогалевын, композитор Наталья Каршын мастер-классыштыже лийме кужу жаплан шарнаш кодеш. Икманаш, «Сириус» опытан педагог, артист, музыкант-влак деч урокым налаш, нунын мастарлыкыштым ончаш да Российысе талантан икшыве-влак дене палыме лияш йӧным ыштен.

Егор дене вашлиймаште йоча сымыктыш школышто тунемше-влакат ятырын лийыныт. Нунылан ой-каҥашым пуымо семын рвезе тыгерак мане:

Илышыште шке вий дене кӱкшытыш шуаш шонеда гын, книгам лудаш ида ӧркане. Тыге те уш-акылдам пойдареда, шонымашкыда шуаш икымше ошкылым ыштеда.

А самырык пианист шонымашкыже шуаш огеш лӱд, вет тудын пелен опытан, чолга педагог, Марий Эл культурын сулло пашаенже Алла Валентиновна Смирнова уло.

Алевтина Байкова

Авторын фотожо

Опубликовать в Одноклассники

Добавить комментарий