30 август гыч 4 сентябрь марте Южный-Сахалинскыште «ОстроVа2020» Россий кӱкшытан патриот форум эртен. Марий Эл гыч ты мероприятийыш кум еҥ ушнен. Тиде — Юрий Пурынычев, Мария Дудина, Ксения Белынцева.
Тора мландыште эртаралтше мероприятий гыч шукерте огыл пӧртылшӧ ӱдыр, республикысе «Тӱвыра волонтёр-влак» ушемын координаторджо Ксения Белынцева дене тиде форум нерген мутланышна.
«Сахалин ӧрыктарен. Тушто йӧршын вес тӱвыра. Верысе калыкын тӱня умлымашыже, шонымашыже ойыртемалтше. Тидыже ваш мутланымаште, пашам ыштымаште поснак шижалтеш. Тушко миен толмеке, шке шочмо кундемем утыр йӧраташ тӱҥальым.
Мый медиа алан деке кумылан-влак дене пырля лийынам. Тунемме програмына пеш пайдале ыле. Поснак проектым возаш келшен. Ме Южный-Сахалинскыште лийше-влаклан увер порталым ыштыме. Шонымашна почеш, кажне еҥ тушко пурен, отро нерген шке шонымашыжым возен коден кертеш. Тидыже верысе калыкланат, тушко уналыкеш толшо-влаклан пеш кӱлешан, шонем. Форумышто шуко уым пален налмем ончыкыжым шке пашаштем кучылташ тӱҥалам.
Культур программе почеш мотор вер-шӧрым ончыктеныт. Тыге теҥыз деке коштмо, курыкыш кӱзен волымо, пӱчӧ питомникыш миен толмо.
Эн нелыже самолёт дене чоҥешташ ыле. Тудо кандаш шагат жапым налын. Йӧра кеч тамлын пукшеныт (воштылеш). Тидланже мемнан авиалиний-влаклам тауштыманак», — палдарыш Ксения.
О.МОШКИНА
