10 апрельыште Марий Элым вуйлатыше Александр Евстифеев «Сосновый бор» санаторийыште коронавирус дене черланен кертше граждан-влаклан палемдалтше обсерваторыш миен коштын.
Тушто кызыт COVID-2019 дене авалталтын сеҥыше еҥ уке, но регионысо Тазалыкым аралыме министерствын да Роспотребнадзорын Марий Элысе виктемжым вуйлатышын акышт почеш, тӧнеж нуным приниматлаш ямде.
«Мом ямдылаш кӱлын гын, чылажымат ончылгоч ыштыме. «Сосновый бор» санаторийым обсерваторын режимышкыже кусарыме нерген кӱштымаш 20 февральыште лектын. Санаторийын кок пачашыштыже коронавирусан черле дене кылым кучышо 40 еҥым пурташ ситыше ныл веран кок пӧлеман 12 номерым резервироватлыме», — А.Евстифеевым палдарен Марий Элын молодёжный политике, спорт да туризм министрже Лидия Батюкова.
Регионым вуйлатыше граждан-влакым вераҥдыме условийым аклен да персоналын ончыкылык пашалан мынярак ямде улмыжым рашемден.
«Сосновый бор» санаторийын директоржо-тӱҥ врачше Валерий Башировын каласкалымыж гыч, тӧнежым «лавыран» да «яндар» кумдык-влаклан ойырымо. Обсерваторышто врач, медсестра да санитарке-влак пашам ышташ тӱҥалыт, тыгак дежурный медсестран суткаш постшым ыштыме.
«Чыла медпашаеҥ Россий Федерацийын Тазалыкым аралыме министерствыжын Медицине да фармацевтике шинчымаш порталыштыже у коронавирус инфекцийым диагностироватлыме, эмлыме да тудын деч аралалтме пашалан тунемын», — рашемден В.Баширов.
Тӱҥ врачын мутшо почеш, обсерваторын пашаеҥже-влаклан административный корпусын номерлаштыже тӱшкагудым ыштыме. Нуным санаторийын кочмыверыштыже централизованно пукшат. А коронавирус дене черланен кертше-влаклан кочкышым номерлашкышт намият да ик гана пайдаланыме атышӧрыш пыштен пуат, тылеч вара тудым обработатлат да утилизироватлат.
В.Баширов тыгак дезинфицироватлыме растворын, медицине маскын, перчаткын, шкем аралыме моло средствын шапашыштым ончыктен да санаторийыш кондымо еҥ-влакым приниматлыме радам дене палдарен.
Чылажымат ончен лекме деч вара Марий Элым вуйлатыше Александр Евстифеев ответственный еҥ-влаклан икмыняр задачым шынден.
«Обсерватор кӱлеш, тидым федеральный закон йодеш. Тудым пеш чапле зданийыште ыштыме. Обсерваторышто кужу жап илаш лиеш. Петырналтмаште кок арня лияш неле, сандене кок пӧлеман, кажныштыже кок малыме вер улман номерын форматше келшыше, — палемден регионым вуйлатыше. – Коллективын пашаеҥже-влак нигушкат огыт кай, вес пачашыште кок арня илат. Тугеже нунылан коммуникаций да медицине контроль велым чыла шотыштат келшен толшо верым ямдылыман. Йӱшаш вӱдым, кочкыш продуктым, гигиеным шукташ кӱлмӧ чыла материалым, торым оптымо верым жапыштыже да грамотно ямдылыман», — палемден А.Евстифеев.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
