Марий Эл Республикын здравоохранийышкыже кугу надырым пыштымыжлан Марий Турек районысӧ рӱдӧ эмлымверлан В.Свининын (снимкыште) лӱмжым пуаш ыштыме.
Вениамин Валентинович Марий Турек районысо Марий Китне ялыште кресаньык ешеш шочын-кушкын. Шочмо кундемысе тӱҥалтыш школым тунем пытарымыж деч вара посёлкысо кыдалаш школышто шинчымашым поген, тыгодымак механизаторын профессийжым налын.
Армий деч вара Казань кугыжаныш медицине институтыш стоматологлан тунемаш пурен. Дипломым налмекше, Марий Турек районысо рӱдӧ эмлымверыш тӱҥ врачын организаций-методике пашаж шотышто алмаштышыжлан толын. Ик ий гыч тӱҥ врач лийын.
Тунам районысо калыклан медицине полышым пуышо пел курымаш пу оралтым коҥгаш олтен ырыктеныт. Но специалист-влакын ситыдымышт поснак кугу нелылыкым луктын. Тӱҥ врач ончыч котельныйым чоҥыктен, тыге пашаеҥ-влак коҥгам олтымо, пум ямдылыме паша деч ярсеныт.
А лу ий гыч Марий Турекыште у поликлинике почылтын, вара – стационар, пищеблок, прачеченый, гараж, медицине пашаеҥ-влаклан пӧрт, патологоанатомический корпус, шӧр кухньӧ, инфекционный отделений.
Вениамин Валентиновичын вуйлатымыж почеш эмлымверыште поликлинике ден стационарын материально-технический базышт уэмдалтынак шоген, аптеке, анестезиологий-реанимаций отделений, бактериологический лабораторий, фитобар, галокамер, грязеводолечебнице, ФАП-влак почылтыныт. Тӱҥ врач эмлыме да диагнозым шындыме у йӧн-влакымат шыҥдараш кумылан лийын.
В.Свинин мер илышыште чолга еҥ семын ойыртемалтын, Марий АССР Верховный Советын депутатше, Марий Эл Республик Кугыжаныш Погынын ныл созыв депутатше лийын. Врач-влакын I Всесоюзный да XIX, XXI Всероссийский съездлашкышт делегатлан сайлалтын.
Пашам сайын ыштымыжлан «Россий Федераций здравоохраненийын отличникше» знак, «Россий Федерацийын сулло врачше», «Марий Эл Республикын сулло врачше» чап лӱм дене палемдалтын.
Вениамин Валентинович поро чонан, весела кумылан айдеме лийын. сандене тудым районысо калык веле огыл, республикыште илыше-шамычат пагаленыт.
М.ИВАНОВА.
