20 январьыште Самырык тукым полатыште добровольчествыште (волонтёрствышто) полышым пуышо регионысо ресурс рӱдер почылтын.
Тиде паша «Социальная активность» ден «Образование» проект негызеш ышталтын. Мероприятийыште Марий Эл правительстве председательын икымше алмаштышыже Михаил Васютин, йошкар тасмам пӱчкын, у тӧнежын почылтмыж дене чылаштым шокшын саламлыш.
Пайрем кышкарыште волонтёр ярминга эртен. Тыгай вакансий шуко вере уло, мутлан Т.Евсеев лӱмеш калыкле тоштерыште, «Доверие», «Розовый одуванчик» организацийлаште. Тыгак Сеҥымашын волонтёржо да медицинын волонтёржылан, МВД-ын наркотик кучылтмым тергыме шотышто Марий Эл Республикысе управленийлан, Йошкар-Олан турист-увер рӱдержылан да молыланат волонтёр-влак кӱлыт.
Южо вереже ушнаш лӱдыкшӧ, шонет. Мо дене полшаш лиеш йодыш лектеш. Тидлан МВД-н пашаеҥже Наталья Отмахова теве мом каласыш: «Эн ончыч волонтёр-влак мыланна профилактике пашам шуктымаште кӱлыт. Кунам мый, кугу айдеме, наркотикын удаже нерген каласкалем, да кунам йоча ден самырык тукым тидым шке коклаштышт ойлат – лектыш тӱрлӧ».
«Мемнан южо волонтёр пашалан тунемман огыл. Мутлан, тӱрлӧ акцийыш ушнен, чер да кузе тудын деч аралалтме нерген увертарымашым ышташ кӱлмӧ годым», – ешарыш медецине нерген каласкалыше ӱдыр Анастасия.
Турист-увер рӱдерат полышым вуча. «Туризм олаште койын вияҥеш. Ме чылаж годым уна-влакым вашлийын огына шукто. Сандене экскурсийым эртарен сеҥеда гын, мемнан деке ушныза», – мане тиде организацийын пашаеҥже Ксения Яковлева. «Мыланна уверым шаркалыше-влак кӱлыт. Мутлан, ме нунын дене пырля школлаш кошташ да пӱртӱс арулыкым аклаш кӱлмӧ нерген каласкалаш тӱҥалына», – палдарыш «Розовый одуванчик» организацийын вуйлатышыже Алексей Иванов.
Кумылда уло гын, ушныза поро пашаш. А кузе тидым ышташ, ынде у рӱдерыште пален налаш йӧн уло.
О.МОШКИНА
