20-22 сентябрьыште Марий Элыште икымше гана туныктышо-влаклан «Лӱдыкшыдымылык школ» фестиваль эртен.

Тушко республикысе школла гыч ОБЖ предметым туныктышо-влак толыныт да икмыняр кужытышто — комбинироватлыме пожарный эстафетыште, икымше полышым пуымаште, тӧрсыран полосаште, илен лекме маршрутышто танасеныт. Тыгак пӱртӱсышто вашлиялтше техногенный туткар годым кычалме да утарыме пашамат шукташышт логалын. Но таҥасымаш деч посна участник-влаклан шке коклаштышт профессиональный темыланат мутланаш, ешартыш шинчымашым налаш йӧн лийын. Тидланак мастер-класс-влак, «йыргешке ӱстел» эртеныт.

Фестивальым Марий Элын Граждан оброно да калыкым аралыме кугыжаныш комитетше, Марий аварийно-утарыше да Пожар ваштареш кучедалме кугыжаныш службо-влак, «Лӱдыкшыдымылык школ» всероссийский йоча да самырык-влакын мер толкынышт иквереш эртареныт.

Жюрин иктешлымашыж почеш, икымше верыш Шернур районысо туныктышо-влак лектыныт. Кокымшо ден кумшо Курыкмарий да Советский районын лийыныт.

Каласен кодыман, у тунемме идалык кажне гаяк школышто «Лӱдыкшыдымылык тылзе» акций дене почылтын. Экстренный службо-влакын специалистышт школаште тунемше-шамыч дене вашлиялтыныт, шкем аралаш, чрезвычайный ситуацийыш логалме годым мом кузе ыштыме шотышто шинчымашым пуэныт. Мутлан, Марий Элын Пожар ваштареш кучедалше кугыжаныш службын пашаеҥже-влак  тыгай урокым йочасадлаште, школлаште эртареныт. Чыла тидыжым модыш йӧнлан, мультфильм ден фильм-влаклан   эҥертен умылтареныт. Пожар годым школ оралте гыч эвакуироватлалташ туныктымо тренировкымат ятыр эртареныт. Мутат уке, тыгай умылтарымаш пашам идалык мучко ышташ тӱҥалыт. Туныктышо-шамыч фестиваль годым налме шинчымашышт дене ончыкыжым тунемше-влакым палдараш тӱҥалыт.

 С.НОСОВА

 Снимкылаште: фестиваль годым.