Йошкар-Ола мучко 2-шо да 8-ше №-ан троллейбусышто кудалмыда годым те Сергей Чавайнын почеламутшо-влакым колыштын кертыда. Кузе?
Умдан транспортыш шичмекыда, кушко волен кодшаш чарналтышдам ойырен налыда да йӱкан полышкалыше Алиса деч поэзий экскурсийым йодыда.Кузе йодаш? Кум йӧн темлалтеш:
1.Нине троллейбуслаште QR-кодан наклейкым пижыктылме. Тусо кодым телефонышкыда сканироватлыман.
- https://clck.ru/32nTNg ссылке почеш йодын кертыда.
- Яндекс=браузерым почса, Алисан кнопкыжым муза да тудлан каласыза: «Запусти навык Троллейбусные экскурсии в Йошкар-Оле».
Поэзий экскурсий марий литературын шочмо кечыжлан пӧлеклалтын, тудым ыштыше-влак 117 ий ончыч, 1905 ий 2 декабрьыште, марий сылнымутын классикше Сергей Чавайнын икымше «Ото» почеламутшылан эҥертеныт. С.Чавайнын почеламутшо-влакым радиодиктор-влак – Марий Эл тӱвыран сулло пашаеҥже, Аркадий Сергеев марла, а Ольга Малова рушла – йоҥалтарат.
– Шым почеламутым лудынна, нунын коклаште – мутат уке, чылалан палыме «Ото», «Мӱкш», «У йӱлан мурыжо», «Сай кутырет, марий калык» да молат, – умылтарыш А.Сергеев.
Каласыман, Аркадий Сергеев тыгай сомылым икымше гана огыл ыштен. У курым тӱҥалтыште Йошкар-Оласе троллейбус чарналтыш-влакым, Йошкар-Ола – Москва пассажир поездыште кӱлешан увер-аҥарым марла увертарымыж дене мемнам, марий-влакым, кугешнаш таратен, а ӧрдыж гыч толшо-влакым куанен ӧрыктарен. Ынде почеламутым колыштса!
Л.СЕМЕНОВА
Фотом Йошкар-Ола администрацийын соцлаштыкше гыч налме
