У ий салам: У Торъял
Район рӱдыштына «Дом Сад Огород» кевытнам тений нылымше гана кумдаҥдышна. Тыге бизнеснам шарен толына. Налшылан сату шуко тӱрлӧ лийже манын, ассортиментым пойдарена. Ынде эсогыл канцеляр сату ден уш пойдарыше модышым ужалаш тӱҥална. Эше кок еҥлан паша вер лекте. Адакше кевытчына-влаклан паша условийым эреак саемдена.
Вес кевытнаже Шернур посёлкышто верланен. Тудым ончычак почмо. Но тидын дене гына ынена серлаге, вес районымат авалташ шонена. Юмо йӧным ышта гын. Да сӧй пыта гын, вет тидат чаракым ышта. Ме ямде нӧшмӧ ден сад-пакча ӱзгарым веле огыл ужалена, шкеак урлыкаш пареҥгым ончен куштена, мӧрын у сортшым шарена.
Шкенан пашаче коллективнам, ӱдыр-влакым У ий дене саламлем. Нуно чылан тыршен ыштат. Айдеме тырша гын, шонымашкыже шуэш. Паша айдемым чолгам ышта, илаш туныкта. Пашам ыштен, эше нигӧат окмак лийын огыл. Мыйын илыш шонымашемак тыгай: його лияш огыл. Илыш ончыко кая, сандене верыште шогымо ок кӱл. Ончыко кайымаш – илыш. Уда койышым – шеҥгеке, сайым – ончыко. Шке от тырше гын, нимо яра ок тол. Пашаеҥна-влакланат, ача-авана ден шочшыланнат пиалым тыланем. Таза лийышт!
И.А.АЛГАЕВА,
индивидуальный предприниматель
