Советский район Пивактын почиҥга ял урем дене эртен кайыме годым Алексей Егорович Иванаевын суртшо молын деч ойыртемалтмым шекланышна. Поснак арке семын ыштыме капкаже пеш оҥай. Мийымына годым суртоза кудывечыштыжак эргыж дене шогылтын. Алексей Егорович ты ялыштак шочын-кушкын. Кызыт шке озанлыкше дене ила. Тудлан эргыже полшен шога. Ты суртым 2003 ийыште ыштен. Ончыч тыште ача-аван тошто пӧртшӧ лийын.
Суртоза дене кудывечым, пакчам ончен лекна. Пӧрт ончылно олмапу, вишне, облепихе, шем пызлыгичке, лӱмегож кушкыт. Алексей Егорович тыгак мӱкшым онча. Пакчаште шындыме чеснокшым агроспан дене петырен шынден.
– Шке озанлык дене илыме кызыт кугу парышым ок кондо. Шкалан веле ончена. Неле пашам куштылемдаш техникем уло. Мландын ик пайже шкемын гын, кокытшым арендыш налынам. Чылаже вич гектарыш шуэш. Кок ушкалым ашнена. Пеленна Дима эргына ила. Пелашем, Тамара Степановна, Ӱшнӱр школышто туныкта.
Шке жапыштыже мый механизаторлан тунем лектынам, колхозышто тыршенам. Колхозна шаланыш. Мом ышташ? Эн ончыч фермерлан ыштенам, вара тӱрлӧ вере пашам ышташ логалын. 2013 ий гыч Москваш вахте йӧн дене коштам, – каласыш суртоза.
Алексей Егорович дене озанлыкшым ончен лекна. Тудо тыгак техникыж нергенат каласкалыш. Суртозан пум шкешотан артанаш оптымыжым, тыгак пӧрт йыр ятыр облепихе кушмым шекланышна.
– Облепихым шочмо кундемышкем Волгоград областьыште улмына годым конденам. Тушто кудалтен кодымо, ончыдымо даче ятыр уло. Икмыняр облепихе вондыжым тушеч кӱнчен луктынна да тышке конденна. Кушкыл иланен да мемнан дене шарлен. Кызыт эсогыл асфальт йымачынат кушкын лектеш. Тыгак вишньымат ятыр шынденна. Тений олма шагал шочын.
Садым ончен куштымо деч посна кидпашаланат шӱман улам. Озанлыкыште чылажымат шке ыштем. Теве кермыч гыч меҥгым, саварым шке оптенам. Кудывече покшелне тавымат шогалтенам. Пӧртыштӧ каминым, мончаште коҥгам шкеак оптенам. Икманаш, канаш жап йӧршынат уке. А ялыште вес семынже огешат лий. Йогыланен киет гын, нимогай сомылетат огеш вораҥ, – мане Алексей Иванаев.
Михаил СКОБЕЛЕВ,
Лидия ШАБДАРОВА
М.Скобелевын фотожо
