Марий Элыште экстренный оперативный службын «112» номерышкыже полшым йодын йыҥгырташ йӧным пуышо системым тений 19 апрельыште пашаш колтымо.
Тиде системыш пурышо чыла йыҥгырым ончен лекше рӱдерын операторжо-влак йӱдшӧ-кечыже пашам ыштат. Рӱдер Йошкар-Олаште верланен. Граждан-влак деч куд автоматизироватлыме верыште йыҥгырым налыт. Тушко илышысе неле ситуацийыш логалше-влак полшым йодын лектыт.
Тыгак тыгай автоматизироватлыме вер-влак оласе округ ден муниципальный образований, экстренный оперативный службо-влакын (пожарный охране, вашкеполыш, газ сетьын аварийный службыжо, антитеррор службо, Россий МЧС-ын Марий Элысе Тӱҥ управленийжын кризис ситуаций виктемжын рӱдерже) единый диспетчер службылаште ышталтыныт.
«112»-системе шкенжын кӱлешлыкшым тиде жапыште пеҥгыдемденат шуктен. «01», «02» гай номерлаш тымарте йыҥгыртыше-шамычат ынде лач «112»» номерлан эҥертат. Суткаште 2 тӱжем наре йыҥгыр пура. Чылажат возалт кодеш. Оператор-влак йыҥгыртыше еҥын координатшым пеш писын рашемден кертыт. Тидыже чодыраште але телым колым кучымо годым йомшо еҥ-влакым писын муаш йӧным ышта.
Граждан-влак «112» номерыш сотовый телефон гычат йыҥгыртен кертыт, кеч нуно операторын ыштыме зоныштыжо огыт лий гынат. Тыгак телефонышто окса але SIM-карт уке гынат, йыҥгырташ лиеш. ЭРА-ГЛОНАСС датчикан авторанспорт гычат йынгырташ йӧн уло.
Чыла йыҥгырым оперативный дежурный-влак шотыш налыт. Но палемден кодыман, «112» системе справкым пуышо службо огыл. Сандене тушко амал деч посна йыҥгырташ огеш кӱл, вет тиде жапыште линийым айлыше чынжымак полышым вучышылан мешаен кертеш.
С.Носова.
