Марий Эл вуйлатыше Юрий Зайцев шефствыш налме Запорожский область Куйбышевский районлан полшен шогымо пашаште кугу верым йочасад ден школ-влакым уэш пашаш колташ лиймылан ойыра.
Мутлан, 2024 ийыште Шевченское селаште йочасадын леведышыжым олмыктымо. Но 2025 ий февральыште ВСУ тудым угыч кассетный боеприпас дене лӱйкален. Февраль мучко ты селаштак тӱвыра пӧртым да илыме пӧртым ик гана веле огыл лӱйкаленыт.
Марий Эл вуйлатышын кӱштымыж почеш, лишыл жапыште нуным да Благовещенка селасе школын леведышыжым уэмден олмыкташ тӱҥалыт.
Марий Эл вуйлатышын у регион-влак дене пашам ыштыме шотышто советникше Евгений Кузьмин шукерте огыл Куйбышево посёлкысо Святой Духын черке настоятельжылан мемнан республикысе Советский районысо Святой апостол-влак Петр де Павелын Ӱшнӱр селасе черкыжын настоятельжын йодмыж почеш юмоҥам кучыктен (снимкыште). Тусо Камыш-Заря посёлкышто верланыше Свято-Серафимовский ӱдырамаш монастырь леведышымат лишыл жапыште олмыктышаш улыт.
Светлана Носова
Фотом Е.Кузьминын воткыл лаштыкше гыч налме.
