Таче, 26 майыште, Марий Элыште антинаркотический месячник тӱҥалын.
Тудо 26 июньышто палемдалтше Наркоманий да наркобизнес дене кучедалме тӱнямбал кечылан пӧлеклалтеш.
Тылзе жапыште тӱрлӧ вере ятыр мероприятий лиеш. Тиде, мутлан, «Пале да арале шкендым!» онлайн-викторине, соцкыллаште увертарыме антинаркотический флешмоб. Тушкыжо волонтёр-медик-шамыч да самырык-влакын лидерышт ушнат. Самырык-влакын полатыштышт МВД-н, республикысе наркодиспансерын пашаеҥышт-влак, тыгак диспансерын наркологшо да психологшо-влак дене вияш трансляций-влак лийыт. Самырык еш-влакым чумырышо «МАМАПАПАФЕСТ» мероприятий палемдалтеш. 4 июньышто Йошкар-Олаште, Ната Бабушкина лӱмеш скверыште, самырык-влак «Почешем курж!» куржталмашыш лектыт. МарГУ-н спортклубшын тренерже-влак «Кроссфит» тӱшка тренировкым эртарат. Эсогыл театр-влакат ты месячникыш ушнат. Марий самырык театр «Life must go on…» («Пять двадцать пять»), М.Шкетан лӱмеш марий национальный драме театр «Короткий день» спектакль-влакым ончыктат. Тыгак тылзе жапыште организаций ден учреждений-влак тергыме тӱрлӧ рейдымат эртарат.
Месячник 26 июнь марте шуйна.
Л.Камалетдинова
