У ийыште - у семын УВЕР ЙОГЫН

У ий салам: Морко

У ий салам: Морко

Тенийысе идалык ӱмашсылак СВО шӱлышеш эртыш. Тудо ончыктыш: ме пеҥгыдемына – экономике могырымат, чон яндарлык шотыштат. Тугеже ончыкылыкна лиеш – тидыже куандара.

Озанлыкым кучымаште да пашаште нелылык лекте гынат, идалыкым сай лектыш дене мучашлена. Вольык вуй да шӧр лӱштыш денат, шурно лектыш денат ӱмашсе деч кушмо.

Кугыжаныш Погынын депутатше семын теве мом палемдынем: ончыч политике илышыште ӱчашымашат, умылыдымашат лийыныт. Тенийысе идалык ончыктыш: кеч-могай партий ден толкынышто улына гынат, кӱлеш годым ме ик радамыш шогалын каен моштена. Ушен шогышо шӱлышна йомын огыл – тидат куандара.

Куштылго огыл пагытыште пеҥгыдын каен кертына гын, шушаш ийланат озанлык пашаште тыгаяк планым шындена: ончыкылык нерген шонен, шукырак продукцийым ыштен налаш, озанлыкнам вияҥдаш.

У ий вашеш Марий Элыште, Российыште илыше чыла еҥлан тыланыме шуэш: ваш-ваш умылымашым эшеат кугурак кӱкшытыш нӧлталаш кӱлеш. Тунам ме палаш тӱҥалына: мом ме ыштена, кушко каена. Тыгай калыкым вара йот шонымашан нимогай вият шӱкалын ок керт. Уло калыклан пеҥгыде тазалыкым, паша кумылым, улан илышым тыланем!

Ю.А.ИГНАТЬЕВ,

«Передовик» ялозанлык артельын председательже,

Марий Эл Кугыжаныш Погынын депутатше

Опубликовать в Одноклассники

Добавить комментарий