(Тӱҥалтышыже 2021 ий 47, 48, 2022 ий 1-ше №-ан газетыште)
Тылеч варат нуным пырля ужын ыле. Тудын деч кӱкшырак капан, моторрак улмыжымат умыла. Шкенжым ӱшанлын куча, но ала-можо дене Виталийым кожгандарыш. Аракам подылаш йӧратыше еҥ гай вудака шинчан, шинчасортажат шарлыше. Но тыге гынат марийлыкеш пуртымо пӧръеҥжым кидпӱанже гыч туге руалтен кучен, тевак пуйто кечалтеш. Ӱмбакыже ончал-ончал колта! Туге шол, илыш мардежыште лийын, кужу жап кылмен, ноен шуктымеке, да эше торжанак «кыралтмеке» сайынак шуаралтат. Тыгай деч вара тетла шкет гына кодаш огыл ыле шонен, ынде кеч-кӧ декат кержалташ тореш от лий!
Ты татыштат Виталий нимогай ушкалымашым, кӧранымашым чоныштыжо ыш шиж. Ала-можо садак жалын чучеш: эртыше жап мо ли, пӧртылташ лийдыме пиалан еш илыш? Шӧртньӧ самырык пагыт?!
Тыге шонкалымыж годым Виталий шканже шоҥго кугызала чучын колтыш. Чылажат эртен кайыш, шеҥгелан кодо, еш илышыште шот ыш лек.
А чонжо торешлана: тылат улыжат кумло куд ий, а тый шкендым пытартыш корнышкат ужаташ ямде улат! Эх, тый! Аҥырат отыл, образованиетат уло, шуко палыше улат. Нигӧ дене кутырыде, тӱшкагудысо коморкышкет пеш эр шылын шинчынат! Тыге тый чынжымак, шиждымын, вашке Петя чӱчӱэтак лиятак!
…Альбина уло чон дене икымше гана йӧратен шындыме ӱдыр манашат лиеш. Садланжат моло весе дене ты ийготышто уэш палыме лияш, адакшым шкем темлаш тӧчен пижедылаш – тыга-ай орадылынымашда чучеш. Но тыгодымак мо ӧрыктара: жапын-жапын тудын еҥ коклаште лиймыже шуын колта. Шкет илымыжат ок шу. Но вет уремыш лектын, палыме лияш «те мыйымак вучышо огыдал?» манын кажныж деч от йод. Ала тудын марийже да йочажат икте веле огыл? Такшым чыла вере: уремыште, троллейбусышто, кевытыште – черетым вучен шогымо годымат палыме лийын моштышо еҥ-влакат шагалын огытыл. Тыгай ийготышто куштымаш касыш миен толаш? Ой, ала-кузе йӧндымын чучеш! Адакшым куптыр дене леведалтын шуктышо да алиментым тӱлышӧ, эше тӱшкагудышто илыше пӧръеҥым кызыт могай шотан ӱдырамаш ончалеш?! Тыгай кӱлеш-оккӱлым шонкален, шкем нимолан семалаш!..
… Теве тынар йӧндымылыкым шижше, шкет илыше айдемым утарен, увертарымаш гоч пелашым муаш полышкалыше газет улмо нерген Виталий вучыдымын пален нале. Увертарымашым возаш тӧчен, икыняр кас йӧсыланен орланыш. Весе гын тынар кечыште тыга-ай романым удыркален пуа ыле, а тиде шкеж нерген улыжат икмыняр корным возен керте. Тевыс кузе лекте:
«Ватым ойырышо да алиментым тӱлышӧ кумло куд ийым эрталтыше пӧръеҥ улам. Тыгаяк ийготан ӱдырамаш дене, йочан гынат нимат огыл, ешым погаш тореш омыл. Ешартыш увер: илыме верем уке, тӱшкагудышто илем. Изирак капан, шинчаш перныдыме чурийвылышан улам. Кумылда уло гын, тыгай адрес дене возаш лиеш…». Кӱшыл образованиян улмыжымат ыш возо, шылтен кодыш.
(Умбакыже лиеш)
