Тений мемнан организацийлан 80 ий теме. Тыгай кугу ийготан тӱшка озанлыкше кызыт шагал кодын. Йол ӱмбалне пеҥгыдын шогаш манын, тудым умбакыже вияҥдыде огеш лий. Тыге ты ийын торфым фасоватлыме ик цехым пужен чоҥышна, тусо чыла оборудованийым вашталташ логале. Паша лектыш кодшо ийысе дене таҥастарымаште 20 процентлан ешаралте. Пашаеҥ-влакын кумылыштым нӧлталшашлан «Элнет» участкыште у столовыйым чоҥен пытарышна. Вес ий тӱҥалтыште пашаш колташ шонена.
Шушаш ийлан планна могай? Кугу ийготым ончыде, предприятийна йол ӱмбалне шогышаш, умбакыже илышаш. Цехым пужен ыштыме деч вара лектышым кугемден толман. Тачысе кечылан продукцийнам Россий мучко 27 регионыш колтена гын, ончыкыжо ужалыме географийым кугемдаш, ассортиментым пойдараш шонена. Тиде тӱҥ паша.
Илышна кызыт куштылго огыл гынат, вуйнам огына саке, ончыкыжат тыршен ышташ шонена. Тыге гына аралалт кодаш лиеш. Пашаеҥна-влакым, районысо да республикысе калыкым У ий дене саламлем, чылалан пеҥгыдылыкым да тазалыкым, улан илышым да пиалым тыланем!
В.Д.Дубников,
«Параньга торф предприятий» ОАО-н генеральный директоржо
