Волжск оласе Тазалык рӱдерлан медицине оборудованийым налме паша тенийлан мучашлалтын.
«Кужу да чолга илыш» нацпроект дене келшышын рӱдер 916 тӱжем утла теҥгеаш шым единице оборудованийым налын. Тиде:
- артериальный давленийым висыме аппарат;
- глюкозым эскерыме системе;
- айдемын шӱлалтен лукмо южыштыжо углеродын окисьшым рашемдыше анализатор;
- кӱварысе электрон виса;
- медицине ростометр;
- шӱлышын функцийжым висаш профессионал диагностический спирометрым;
- биоимпедансметр.
Тений январь гыч Волжск оласе рӱдӧ эмлымверын Районысо рӱдӧ поликлиникыжын филиалжын кумдыклаштыже верланен да Волжск, Морко да Звенигово районлаште илыше калыкым обслуживатла.
– Рӱдерыштына кок опытан врач – Эльвира Хаяли ден Владимир Захаров – пашам ышта, – каласкала филиалын заведующийже Елена Баранова. – Мемнан дене еҥ-влак черланыме деч ончыч тазалыкым тергышт манын шонена, вет чер вияҥме лӱдыкшым ужмеке, доктор пайдале ой-каҥашым пуа. Пытартыш жапыште рӱдерышкына самырык-влак шукынрак толаш тӱҥалыныт, тиде куандара. Ала-кӧжӧ чогашылым «куштынеже», ала-кӧжӧ, мӧҥгешла, уто нелыт деч утлынеже. Сандене врачын ой-каҥашыже нунылан кӱлешан. Нацпроект почеш налме биоимпедансметр самырык-влакым тазалыкым тергаш поснак кумылаҥда. Мутлан, тидын деч ончыч организмыште вӱдым, чогашыл да коя тканьым тергаш Озаҥыш каяш логалын гын, ынде тидым мемнан дене йӧршеш яра ышташ лиеш. Рӱдернан врачше консультаций деч вара пациентым участковый терапевт деке приёмыш возен кертеш.
Палемдыме нацпроект почеш Тазалык рӱдерлам у оборудований дене пойдарыме пашалан 2025-2030 ийлаште республикна 3,6 миллион теҥгем налшаш.
Фотом Марий Элын Тазалык аралтыш министерствыжын сайтше гыч налме.
