Курыкмарий кундем гыч кинорежиссёр Андрей Огородниковын «ЕВСЕЕВ. Признание ценою в жизнь» кинофильмже II Буддийский тӱнямбал кинофестивальыште «Эн сай документальный фильм» номинацийыште сеҥышыш лектын.
Фестиваль Тыва Республикын Кызыл олаштыже эртен. Чылаже тӱнямбалсе 6 да Российын 9 регионжо гыч 28 фильм ончыкталтын.
А 17 майыште ты фильмым М.Шкетан лӱмеш марий кугыжаныш национальный театрыште ончаш йӧн ли йын. Тудым ончаш мийыше калыклан кинопаша моткоч келшен. Показ деч вара режиссёрлан тауштен, шуко поро шомак йоҥгалтын. Ончаш толшо-влакын палемдымышт почеш, фильмын структурыжак ойыртемалтше. Эшежым тушто тошерын фондшо гыч шуко материалым кучылтмо. Андрей Огородниковлан да уло съемочный группылан калыкнан чын историйже дене дене палдараш тыршымыжлан чыланат тауштеныт. Фильмлан семым возышо композитор Григорий Архиповынат суапшым палемденыт. Тудо герой-влакын чоншижмашыштым келгынрак почын пуаш йӧным ыштен.
Ушештарыман, «ЕВСЕЕВ. Признание ценою в жизнь» фильм «Россия –Взгляд в будущее» региональный кинематогорафлан полшышо фондын шийвундыж дене ышталтын.
С.Носова
Снимкыште: А.Огородников (шола гыч кумшо) Кызылыште эртыше фестиваль годым.
Фотом тудын соцкыл лаштык гыч налме.
