25 январь – Россий студенчествын кечыже.
Студент пагыт – эн волгыдо, весела пагыт. Йолташ-влак, Те тиде кечым кузе эртареда? Студент жап мо дене ушешда кодын?
Нина ТЯТЮКОВА, Курыкмарий районысо Йоласал ремесло пӧрт вуйлатыше:
– Студент жап эреак волгыдо, поро шарнымашым кода. 2001 ийыште Йошкар-Оласе технологический колледжым «Моделирование и конструирование одежды» специальность дене тунемын лектынам. А кызыт мый Марий кугыжаныш университетын студенткыже улам, «Социо- да этнокультур вуйлатыше» специальностьым налаш ямдылалтам. Студент кечым посна палемдымаш уке, лач тиде кечын ме эргымын шочмо кечыжым пайремлена. 13 ийым тема.
Лидия ВЕТКИНА, кидмастар (Шернур район):
– Весела студент жап 1982-1984 ийлаште Йошкар-Оласе медицине училищыште эртен. Группыштына ме оласыжат, ялысыжат кумло еҥ лийынна. Икте-весе дене келшен, ваш-ваш полшен иленна. Студент пагыт моткоч писын эртен кайымыла чучын, тунемашат, спорт дене кылым кучашат жапым ойыраш тыршенам. Ече дене таҥасымаште Российын тӱрлӧ олаштыже лийынна, эсогыл Кольский пелеотросо Апатиты олашкыжат миен шуынна.
Училищым тунемын пытарымылан ятыр жап эртен гынат, тӱшка вашлиймашым ик-кок гана веле эртаренна. Но ме, Морко, Волжский, Шернур районысо ӱдыр-влак, чӱчкыдынак вашлийына да икте-весе деке унала коштына, кажне пайремлан ваш-ваш саламлена.
Татьяна ОФОНЬКИНА, математике дене туныктышо:
– Тиде кечым посна огына пайремле. Студент пагытем 1994-1999 ийлаште Крупская лӱмеш Марий педагогический институтын физике да математике факультетыштыже эртен. Пырля тунемме йолташ-влак дене чӱчкыдын вашлийын огына керт, кызыт чылан пашам ыштат: математикым але физикым туныктат, завуч але директор сомылым шуктат, йочасадыште тыршышат улыт. Южышт образований гыч каеныт, вес сомылым шуктат. Пашашт шуко кажныжынат, садлан телефон дене мутланена. Но квалификацийым нӧлтымӧ курслаште, ЕГЭ але ОГЭ-м эртарыме, экзамен пашам тергыме годым вашлийына. Тыгай годым чот сагыныме шижалтеш, чон куанен мутланена. Ойырен налме предметна куштылго огыл, садлан студент годым эре да шуко тунемынна. Но южгунам чоным кандараш «Марий сем» ансамбльыш коштынам. Туштак марий шӱлышан поро йолташ-шамычым вашлийынам. Концерт дене тӱрлӧ кундемыш лектын коштынна. Моткоч весела пагыт ыле! Ансамбль йолташ-влак дене таче кечынат кылым кучена, вашлийына. Спортлан шӱман лийынам, капем изи гынат, баскетбол дене модынам, физматын сборный командыштыже лийынам. Тӱрлӧ таҥасымаште вийым тергенам.
Школышто математикым туныктышемлан Рафида Шакуровна Рахимовалан вуем савем, таум каласем. Тудак класс вуйлатышына лийын, мыйым математикылан шӱмаҥден, туныктышылан тунемаш каяш ойым пуэн. Жапыштыже чын корным ойыраш полшымыжлан Рафида Шакуровналан моткоч кугу тау! Ойырен налме специальностем дене лу ий наре Пошкырт кундем Пӱрӧ оласе йоча пӧртыштӧ тыршенам, а вараже Йошкар-Оласе кокымшо номеран школышто ятыр ий туныктенам. Чоныштем математик туныктышо ила. Йоча-влак дене пашам ышташ йӧратем, садлан ты профессийым ойырен налмылан ик ганат ӧкынен омыл.
А.БАЙКОВА
Фотом еш альбом гыч налме
