5-7 июльышто олаласе да районласе методический службо вуйлатыше ден методист, йоча да подростко-влак дене пашам ыштыше специалист, клуб учреждений, фольклор коллектив вуйлатыше-влаклан республиканский семинар-практикум эртен. Тушко республикысе тӱвыра да каныме учрежденийлаште тыршыше 29 еҥ ушнен.
Семинарын икымше кечынже клуб учрежденийлаште организационно-методический пашам планироватлыме, пуымо услугын качествыжым саемдыме, икмыняр моло йодышым каҥашеныт гын, кокымшо кечынже мероприятий Звенигово районыш куснен. Тушто эн ончычак районысо тӱвыра отдел вуйлатыше Л.Михайлова учреждений-влакын пашашт, нелылыкышт да сеҥымашышт дене палдарен. Какшамарий тӱвыра пӧрт пеленсе «Ӱшанлык» ансамбльын вуйлатышыже Н.Мишина шке коллективше нерген каласкален. Тылеч вара ансамбль чодыра волтымо йӱлам ончыктен. Верысе краевед, Какшамарий книгагудын специалистше Л.Сорокина шочмо ялжын историйже да мо шотышто ойыртемалтше улмыж дене палымым ыштен. Тылеч вара погынышо-влак тошто арвер ден ӱзгар-влак тоштер-усадьбым ончен савырненыт.
Умбакыже семинарын участникше-влак Ташнур тӱвыра пӧртыш тарваненыт. Тушто «Алан» фольклор ансамбль (вуйлатышыже А.Дружинин) «Сурткайык – еш поянлык» да «Шудо солымаште» (снимкыште) йӱла-влакым ончыктен. Тыгодым тӱвыра пӧртын фойештыже кидпаша да икшыве-влакын сӱрет выставкышт эртен, семинарын участникше-шамычым шудо чай дене сийленыт.
Семинар жапыштак погынышо-влак Звенигово оласе калык мастарлык пӧртын пашаж дене палыме лийыныт. Тудын специалистше-влак И.Чугунова ден Н.Майкова «Суксо» аралтышым ыштыме мастер-классым ончыктеныт. Тыге кажне участник шканже пӧлекым ыштен наҥгаен.
«Пӧртсий» йӱлан ик ужашыжым уна-влак Чуваш-Отар ялысе тӱвыра пӧртыштӧ ончен кертыныт. Тудын дене «Чувашъен» калык фольклор ансамбль палдарен. Туштак погынышо-влак чуваш калык кочкышым тамленыт да акленыт.
Семинар-практикум Эсмекпляк тӱвыра да каныме рӱдерыште мучашлалтын. Участник-влаклан верысе «Олык сем» ансамбль (вуйлатышыже З.Кушакова) «Авын мелна» йӱлам ончыктен.
Икманаш, тиде мероприятий рашемден: тӱвыра да каныме учрежденийлаште яра жапым веселан, оҥайын да пайдалын эртараш лиеш. Санденак тӱвыра пашаеҥ-влак тыгай семинар-практикумыш чумырымылан тауштеныт да, опыт дене пайлалташ манын, ончыкыжым тыгай творческий лабораторийым районлашке лектын чӱчкыдынрак эртараш темленыт.
Л.Камалетдинова.
