КУЛЬТУР ДА ИСКУССТВО

«Марий Элын талантан самырык еҥже-влак»

Тыгай лӱман конкурс 19-21 апрельыште Йошкар-Олаште эртен.

Тений тудо луымшо гана республикысе чолга да усталык шӱлышан ӱдыр-рвезе-влакым чумырен. Нуно кум номинацийыште («Музык искусство», «Куштымаш искусство» да «Изоискусство») таҥасеныт.  

Икымше кечын самырык сӱретче-влак шке пашаштым Республикысе сӱретсымыктыш тоштерыш выставкыш луктыныт. Ӱдыр-рвезе-влак радынаштым тӱрлӧ жанр дене ямдыленыт: пӱртӱс сӱрет, портрет, натюрморт, графике… Самырык сӱретче-влакын акварель, ӱй, карандаш дене ыштыме пашашт ойыртемалтше, кумылым нӧлтышӧ улыт, эсогыл южыжым   художественный, сымыктыш школын але Йошкар-Оласе художественный училищын огыл, а профессионал ямдылен, шонет. Сӱрет-влакым 12 май марте ончаш лиеш.

А вес кечынже мурышо да куштышо-шамыч мастарлыкым ончыктеныт.

Конкурс 21 апрельыште гала-концерт дене мучашлалтын. Эн тале, чолга ӱдыр-рвезе-влак М.Шкетан лӱмеш Марий национальный драме театрын сценышкыже уэш ик гана лектыныт. Кажне конкурсантым зал тич погынышо калык шокшо кидсовыш дене вашлийын. Музыклан шӱман ӱдыр-рвезе-влак фортепиано, баян, кларнет, скрипке дене шоктен моштымо мастарлыкым ончыктен, кумылым нӧлтеныт гын, «хореографий искусство» номинацийыште таҥасыше-влак тӱрлӧ куштымаш гоч чоншижмашыштым почын пуаш тыршеныт.

— Конкурс самырык ӱдыр рвезе-влак коклаште талантанжым ойыраш полша. Ме палена, лач тыгайышт республикын чапшым тӱрлӧ вере аралат. Кажныжым эскерена да сеҥымашыштлан пырля куанена, — ойлен саламлышыжла тӱвыра, печать да калык-влакын пашашт шотышто министр Константин Иванов.  Тений юбилейный конкурс, садлан тушко моткоч шуко участникым, тӱрлӧ ийлаште конкурсышто сеҥыше-влакым, ӱжыныт, лач нунышт жюри семын пашам ыштеныт.

Мутлан, Александр Селиванов. «Марий Элын талантан самырык еҥже-влак» конкурсышто 1998 ийыште участник лийын да гран-прим сеҥен налын. А кызыт Селиванов – Гнесинмыт лӱмеш Россий музык академийын доцентше.

— Тачысе самырык тукымын матарлыкшылан куанаш веле кодеш. Нуно шке туныктышыштын традицийыштым умбакыже шуят: тунемыт, музык искусствышто вияҥыт. Тыге нуно ойырен налме специальностьыштым эше ик гана кӱлешанлан шотлен, тидым пеҥгыдемденыт, — каласен жюри председатель, семӱзгарым шоктышо-влаклан акым пуышо А.Селиванов.

— Конкурс жапыште куштымаш искусство дене илышыштым кылдыше ӱдыр-рвезе-влакым ончалаш пуренам ыле. Жюриште да сценыште тунемшем-влакым ужынам да чонем куан кумыл авалтен. Лач тыге ме чон йодмо пашам тукым гыч тукымыш шуйымым ончыктена, — чонжым почеш Константин Анатольевич. Тыгай конкурс 1993 ий годсек кум ийлан ик гана эрта. Тиде жапыште моткоч шуко ӱдыр-рвезе тиде корным эртен да республикыштына веле огыл, Российын тӱрлӧ кундемыштыже але вес элыште мастарлыкым шуара, пашам ышта да тачысе кечылан  калыкыште палыме еҥ улыт.

Тенийсе конкурсышто Гран-прим Константин Рябин, Данил Малов (И.Палантай лӱмеш тӱвыра да сымыктыш колледж) да Антон Соколов «Йошкар-Оласе художественный училище) сеҥен налыныт. Нуно да моло сеҥыше-влакат кум ий жапыште Тӱвыра, печать да калык-влакын пашашт шотышто министерствын именной стипендийжым налаш тӱҥалыт.

Тиддеч посна Аккордионист-влакын тӱнямбалсе конфедерацийыштын председательже А.Селиванов Гран-прим сеҥен налше Константин Рябинлан августышто Китайысе Шэньчжэнь олаште эртыше «Тӱнямбалсе кубокыш» ӱжмашым ыштен.

Самырык музыкантлан Марий кундемнан лӱмжым кӱшнӧ кучаш да сеҥымаш дене пӧртылаш тыланена.

Алевтина Байкова

Фотом Национальный президент школын архивше гыч налме

Опубликовать в Одноклассники

Добавить комментарий