Пошкырт кундем Илиш районысо Алач ялыште шочын-кушшо, а кызыт Йошкар-Олаште илыше мурызо Татьяна Умурбаева эстраде аланыш эртыше курымын 90-ше ийлаштыже толын.
Ик жап Я.Эшпай лӱмеш Марий кугыжаныш филармоний пеленысе «Мари» ансамбльын солистше лийын. Концерт дене республик мучко веле огыл, тудын деч ӧрдыжтат шуко вере мастарлыкым ончыктен. Кызытат жапше лийме семын тудо репертуаржым пойдара, сценыште калыкым куандара.
Тӱҥ паша верже – Вольык, янлык чер дене кучедалше станций. Ынде икмыняр ий тушто пресс-секретарьлан ышта.
Могай пашам шуктен шогымыж нерген шкеже тыгерак каласыш:
– Республикысе кугыжаныш ветеринарий службо-влакын пашаштым СМИ-лаште ончыктем. Шуктымо сомыл моткоч келша. Паша дене республикнан тӱрлӧ районышкыжо лектын коштына, ӱмыр мучкышт ялозанлыкыште тыршыше ветеринар-влак денат вашлийын мутланена.
Тиддеч посна Марий ветстанций 2021 ий декабрь гыч Марий Элын Ветеринарий комитетшын кӱштымымыж почеш увер сынан «Ветеринарная хроника» бюллетеньым савыктен луктеш. Тушто вольык чер, нуным чын ончымо, ветеринарий аланыште пашам ыштыше специалист-влак нерген материалым вераҥдена. Тиде изданийым чыла ветучрежденийыш колтена.
А.БАЙКОВА
