Шонымашым, чон-шижмашым але йӧршын весым сӱрет гоч ончыкташ манын, шукышт капыштын тӱрлӧ ужашыштыже татуировкым ыштыктат. Тыгайышт, мыйын шонымаште, утларакше усталык шӱлышан еҥ-влак коклаште вашлиялтыт.
Татуировкын кӱлешлыкше уло мо? Марий мурызо, артист але палымына-влакын тудым ыштыктат мо? Сӱретышт мом ончыкта?
Алеся Владимирова, «Марий Эл» ГТРК-н корреспондентше:
– Шукертак татуировкым ыштыкташ шоненам ыле, но варажым шонымашем вашталтын: капем сӱрет дене «лавыртымем» шуын огыл. Жап эртымеке, илыш умылымаш вашталтеш улмаш да содыки татум ышташ кумылем лектын. Сӱрет шотышто шуко шоненам, лудынам, кычалынам. Изирак да чаткарак татуировкым вачӱмбаке ыштыктенам. Сӱретыште ангичан «V» буква уло. «В» – Владимирова улам, ӱдыремын лӱмжӧ – Виктория, сеҥымаш. Гороскоп почеш шорык улам, сандене тиде тамга эн ончычак шинчаш перна.
Катерина Шабдарова, самырык мурызо:
– Татун кӱлешлыкшым кажне еҥ шканже шке ойыра. Мыйын кок тату уло. Нуным 25 ияш улмем годым ыштенам. Шонымемже дене эше ончычырак ыштем ыле, но изирак лийынам. Татуировко вет ӱмыр мучкылан ышталтеш, сандене шуко шоненам. Такшым тидын нерген ачам дене 20 ияш улмем годымак кутыренам. Тудо тореш лийын огыл. Мӧҥгешла, «айда пырля ышташ каена» манын ойлен. Чот ӧрынам, но тыгодым моткоч куаныше лийынам.
Мо оҥайже, ачам дене кутырен келшыде, ик жапыште татум ыштыктен улына: тудо Йошкар-Олаште, а мый Москваште.
Тату тиде – шарнымаш, кӧ мый улам, мом ышташ йӧратем да илышем мо дене кылдалтын. Кок татужат мыланем лишыл улыт.
Татьяна Соловьева, мурызо:
– Тату южылан пеш келшен толеш, сандене тудын шотышто нимо удажым ом уж. Татуировкым кызыт ӱдыр-влак ыштылыт. Эстетикым кӧ умыла, тудлан келша. Тату – шкешотан искусство. Мутат уке, утыждене кап мучко ыштымым ом йӧрате. Мыйынат тудо уло – пыстыл ден кайык-влак. Тыгайым шукыж годым усталык шӱлышан еҥ-влак ыштат.
Эльвира Куклина, этноблогер:
– Татуировкым ышташ але уке – кажнын шке кумылжо. Мый тыгайым ом ыштыкте: тазалыкланат сай огыл да тиде мыйын стиль огыл.
Евгения Кошкина, кидмастар:
– Татуировкем уке. Мылам сӧрастарыш-влакат ситат, вет нуным кажне кечын вашталташ лиеш.
Надежда Моисеева, поэт, журналист:
– Татуировкым изиэм годсек ыштыкташ шоненам, но тӱрлӧ шонымаш ушым пудыратен да кызытат пудырата. Тудо пешыжак еҥын шинчаш перныме верыште лийшаш огыл шонем, мутлан вачыште але кид вургышто… Татуировкын шке шонымашыже лийшаш, шке значенийже. Илен-толын мыят тудым садак ыштыктем. Мылам ныжылге сӱрет, мутлан, пеледыш пеш келша.
Шарнем, школышто тунемме годым ик рвезе име дене шуркала ыле, мыят тудын деке мияш кутырен келшенам ыле, но ала-можо садак мыйым чарен.
А.БАЙКОВА
Фотом еш альбом гыч налме
