Шочмо элын культурыж ден искусствыжым вияҥдымашке кугу надырым пыштымыжлан да шуко ий пайдалын пашам ыштымыжлан художник, Россий художник ушемын Марий Элысе пӧлкажын еҥже Сергей Сергеевич Алдушкиным «Россий Федерацийын сулло художникше» почётан лӱмым пуымо дене шокшын саламлена.
С.Алдушкин – акварель дене мастарын сӱретлыше. Тудо – Курыкмарий районысо Латансола ялын эргыже. Изиж годымак ты мастарлыклан ачаж деч тунемын. Йошкар-Оласе художественный училище деч вара Москошто В.И.Суриков лӱмеш институтышто шинчымашым нӧлтен. 1995 ийыште Францийыште, Экс-ан-Прованс искусство школышто, стажировкым эртен.
Кызыт тудо ялыште ила да йӧратыме сомылжым шукта.
– Шочмо кундемыштем мылам чылажат лишыл, тыште мый вийым налам, тыштак у пашалан шонымаш шочеш, – манеш сӱретче. – Почётан лӱм дене палемдыме эшеат тыршен пашам ышташ тарата.
А.Байкова.
М.Скобелевын фотожо
