«Марий Эл» газет редакцийыште тыршыше коллективнам да ветеран-шамычым, тыгак республикыштына журналистике аланыште пашам ыштыше коллегына-влакым уло кумылын профессионал пайремна дене, Россий печать кече дене, саламлем!

Журналистике корным ойырен налше еҥ кече еда кундемнан кидшержым, калыкын илыш ойыртемжым шижын пашам ышта. Кажне мутым, шонымашым вискален, еҥ-влак деке шукташ, кунамже сусыр чоным паремдаш, кумылым нӧлташ полша.

Возымо статья, эфирыш лукмо передаче гоч воктеннак улшо еҥ-влакын пӱрымашышт, мастарлыкышт, калыкнан тӱвыраже, илыш йӱлаже, сылнымут поянлыкше почылтеш. А жапым шижын, кунамже ончылтен пашам ыштыме мастарлык айдеме чоныш ласкалыкым, куатым пурта. Тек ончыкыжымат тыгак лиеш.

«Марий Эл» газет коллективлан эртыше идалыкыште поснак тыршаш логалын, вет газетна 110 ияш лӱмгечыжым палемден. Тӱҥ сомылна деч посна мероприятий ден конкурс-влакым, вашлиймаш ден акций-шамычым эртарыме, газетлан у сыным пуртымо. Пашаче ешнат уэмдалтын — самырык-влакат, опытан-шамычат ушненыт.
Эртыше идалыкысе паша лектышна куандара: журналист-влак тӱрлӧ конкурсышто сеҥышыш лектыныт, чап лӱмымат налыныт. Чылажымат республикыштына Россий печать кечым палемдыме годым аклаш йӧн лиеш.

Пагалыме коллеге-влак, шочмо кундемна, калыкна верч тыршыме кажне кечына эреак вий-куатым ешарыже, куаным кондыжо да лектышан лийже.

Светлана Пехметова, «Марий Эл» газетын тӱҥ редакторжо.

Михаил Скобелевын фотожо