Йошкар-Олашке Россий науко академийын Государство да права Институтын директоржын алмаштышыже, РФ-н заслуженный юристше, РФ писатель ушемын секретарьже Александр Звягинцев толын коштын.
Марий Эл вуйлатыше Юрий Зайцев дене вашлиймыж годым писатель шкенжын «Нюрнберг. На веки вечные» книгажым пӧлеклен. Тудынак возымо литературный сценарийже почеш Российысе исторический обществын полшымыж дене художественный фильмым ыштыме, тудо прокатыш тений мартыште лектын. Мемнан республикыштат ончаш йӧн лийын.
Кумдан палыме историкым да писательым республикыштына ужаш кугу чап, палемден Юрий Зайцев да «Нюрнберг» фильм нерген шке шонымашыжым каласен: «Мый уло кумылын онченам. Икымше образований почеш военный кусарыше улам, санденат оҥай ыле. Неонацизм идеологий велыш куснышо-влакым илышыштышт могай мучаш вучымым ончыктымыж дене фильм кызытсе саманыште поснак кӱлешан».
Вашлиймашын участникше-влак исторический шарнымашым аралыме, гражданский позицийым пеҥгыдемдыме, школьник-влакым туныктымо программым уэш ончен лекме нерген каҥашеныт. Марий Эл вуйлатыше республикыштына эртаралтше патриот паша нерген каласкален.
Я.Эшпай лӱмеш Марий филармонийын залыштыже вашлиймаш годым Александр Звягинцев книга сюжетыш вочшо Нюрнберг процессыште СССР велым тӱҥ обвинитель Роман Руденкон (1953 ий гыч колмешкыже СССР-ын генеральный прокуроржо лийын), советский кусарыше-влакын вуйлатышышт Евгений Гофманын шарнымашыштым почын пуэн. Тунам синхронный кусарымашым икымше гана кучылтыныт, кусарыше-влак коклаште Александр Григорьевичын аважат лийын.
Вашлиймаш-лекцийышке Марий Эл Республикын прокуратурыжын, Верховный судын, Росгвардийын сотрудникше, юнармеец, МарГУ-н студентше да моло ӱжмӧ еҥ-влак погыненыт. Нунылан «На веки вечные», «Шахт» (тыгай лӱман подсудимый нацист) да «Свидетели» фильмла гыч ужаш-влакым ончыктеныт. Мучашлан писатель автографан книгаже-влакым пӧлеклен.
Нюрнбергыште эртаралтше тӱнямбал военный трибунал нерген келге документ-влак сборник, научно шымлыме паша уке дене иктак. Александр Звягинцев книгаштыже да фильмыштыжат ятыр секретный документ-влакым, ты процессыште лийше-влакын личный архивыштым кучылтын – тыге мыняр-гынат историй чыным почын пуэн.
Александр Григорьевич – 40 утла книган авторжо, утларакше историй портретым воза. Ятырышт экраныште ончыкталтыт. Йошкар-Олашке толын коштмыжо «Без срока давности» проект кышкарыште эртен.
Л.СЕМЕНОВА
