29 ноябрьыште Марий Эл Кугыжаныш Погынын бюджет да экономический политике шотышто головной комитетше 3 декабрьыште лийшаш сессий вашеш иктешлымаш заседанийым эртарен.
Марий Эл правительстве председательын алмаштышыже – республикын финанс министрже Алексей Торощин тиде комитетын еҥже-влаклан шушаш кум ийлан республикын бюджетшын проектышкыже тӧрлатымашым темлен.
Алексей Анатольевич палдарен, федеральный бюджет гыч ешартыш окса вес ийын тунемше-влаклан шокшо кочкышым яра пукшаш, илалше еҥ-влакым ончаш, азам ыштыме чотым кугемдаш виктаралтше мероприятийлам эртараш, тыштак перинатальный рӱдерлашке медицине ӱзгар ден арвер-влакым налаш, школлам да йочасадлам оборудований дене пойдараш, нуным капитально олмыкташ, корным кӱлеш норматив состоянийыште кучаш да тулеч молылан кая. Тыгак СВО-што улшо да нунын ешыштлан полшаш, образований системым, чодыра озанлыкым вияҥдаш роскот ужаш кугемдалтеш. Муниципал образований-влаклан у сынан полышым пуаш оксам кучылташ палемдалтеш.
Темлыме вашталтыш ден ешартыш-влакым комитет сайлан шотлен да Кугыжаныш Погынлан приниматлаш темлен.
* * *
Тиде кечынак Кугыжаныш Погын председатель Михаил Васютин Президиумын заседанийжым эртарен. Туштат президиумын еҥже ден уна-влак кумшо бюджет сессийлан кузе ямдылалтмым каҥашеныт, 2025 ийлан да плановый 2026 ден 2027 ий-влаклан республикын бюджетшын проектше шотышто заочный публичный колыштмашын иктешлымашыж дене палыме лийыныт, сессийын повесткыжын проектшым пеҥгыдемденыт. Тушто 11 йодыш ончалтшаш. Тыгак тений пытартыш, нылымше, сессий кунам лийшашым палемденыт. Тудо 26 декабрьыште эртаралтшаш.
Тиде заседанийыштак республикын прокуроржо дене лийше вашлиймашын иктешлымашыжым каҥашеныт, Россий Минюстын Марий Элысе управлений начальникше Олег Доронин ведомствын пашаж нерген отчетым ыштен.
Пытартышлан президиумын еҥже-влак Курыкмарий драме театрын артисткыже Налталия Гусяновам Кугыжаныш Погынын Чап грамотыж дене палемдаш решенийым луктыныт.
* * *
Кугарнянак Кугыжаныш Погын ден Марий Элысе элгӧргӧ паша орган-влакын ветераныштын региональный мер организацийышт соглашенийым подписатленыт.
Поснак Кугу Отечественный сарын да боевой действий-влакын, пашан, военный да кугыжаныш службын ветеранышт-влакын праваштым да интересыштым аралыме шотышто ончыкыжым пашам иквереш да ваш келшен ыштыме нерген ойым пидыныт. Ик направленийже семын ветеран-влаклан полышым пуымо дене кылдалтше йодыш шотышто законодательствыш уэмдымашым пурташ темлымаш-влакым ышташ кӱлмым палемденыт.
* * *
Тиде кечынак самырык-влакым куштымаште полшышо «Воспитанники комсомола – моё отечество» общероссийский мер организацийын марий региональный отделенийжын III отчет-сайлымаш конференцийже эртен. Тудо Йошкар-Олаште лийын.
Ушештарен кодаш гын, ты отделенийым Марий Элыште ончычсо чолга комсомол пашаеҥ-влак самырык-шамычым куштымаште полшаш, социально кӱлешан научный, тӱвыра, образовательный, спорт мероприятийлам эртараш шонымаш дене 2015 ийыште почыныт.
Конференцийыш погынышо-влакым Кугыжаныш Погын председатель Михаил Васютин саламлен. Тудо палемден: 9 ий жапыште «Воспитанники комсомола – Мое Отечество» организаций шке кӱлешлыкшым да пайдале улмыжым ончыктен.
– Тышке чумыргышо-влак кокла гыч кажныже кушкын толшо тукымлан пример, – каласен Михаил Зиновьевич.
* * *
Тыгак тудо ты кечынак элнан регионлаштыже Российысе военно-патриотический ушемын шахмат клублажым почмым иктешлымашлан пӧлеклалтше всероссийский видеоконференцийын пашашкыже ушнен. Тудын участникше-влаклан Михаил Васютин палдарен: республикыштына тыгай клуб Чарла Кремль пелен 2 ноябрьыште почылтын. Тыгак тудо участник-влакым мемнан деке Йошкар-Олашке ӱжын.
* * *
Россий Федерацийын сенаторжо, Федераций Советыште Марий Эл Кугыжаныш Погын деч еҥ Сергей Мартынов паша дене Параньга районыш миен да икмыняр предприятийыште тыршыше-влак дене вашлийын.
Мутлан, райрӱдыштӧ «Здравмедтех» компанийын медицине арвер-влакым ыштыме производствыштыжо лийын, тусо паша условийым ончен савырнен, колтымо сатун кугытшо кушмым аклен. Таче тиде бренд дене Москваште, Екатеринбургышто, Казаньыште, Новосибирскыште, Минскыште икмыняр производство пашам ышта. Ик филиалжым ЗАО «Здравмедтех – Поволжье» Параньгаште почын. Палдарыме почеш, тушто медик-шамычлан ямдылыме ик гана чияш (одноразовый) халат, моло вургем, тыгак ик гана кучылтшаш медицинский простынь медпашаеҥ-влакым лӱдыкшӧ инфекций деч аралаш полшат. Тылеч посна ты производствышто кӱкшӧ технологиян тӱрлӧ медполышым пуаш операционный комплект-влакым ыштат.
Любовь Камалетдинова
Фотом Кугыжаныш Погынын соцкыл лаштыкше гыч налме
