9 Майыште Звенигово район Эсмекпляк ял шотан администраций пашаеҥ-влакын организоватлымышт почеш Эсмекпляк селаште, Олыктӱр да Кукшэҥер яллаште «Шарнымаш сорта» акций эртен.
10 шагатлан эртараш палемдыме мероприятийыш тӱрлӧ ийготан да статусан еҥ: йочасадыш да школыш коштшо ӱдыр-рвезе-влак, молодёжь ден кугурак тукым, проста калык ден вуйлатыше-шамыч – погынен. Но Кугу Отечественный сарын ветеранже, сарын йочаже да тылын труженикше-влак эн пагалыме уна лийыныт.
Эсмекпляк ял шотан илем администрацийын вуйлатышыже Галина Героева Олыктӱрыш миен. Тыште Кугу Отечественный сарын ветеранже 96 ияш В.Портов ила. Таче кечылан Провой кундемысе ветеран-влак кокла гыч тудак веле ош тӱняште кодын. Владимир Михайлович митингыш толшо калык ончылно выступатлен да комбриг Родион Охотинлан шарныктыш воктек пеледыш аршашым пыштен.
М.ИВАНОВА
