ЙӰЛА КУЛЬТУР ДА ИСКУССТВО

Шошо кумылан Новруз пайремыште – рушыжат, марийжат…

Марий кундемыштына тӱрлӧ калык ила. Икте-весе дене чылан келшен илена гынат, кажныжын – шке ойыртемже, йӱлаже, тӱвыраже. 27 мартыште Марий самырык театрыште азербайджан калыкын Новруз пайрем радамже дене палыме лияш пиал шыргыжале. Тудым Азербайджан сылнымут да савыктыш кечыла жапыште эртареныт.

Театрыш пурымеке, сылне сем торашке йоҥгалтын. Кокымшо пачашыште «Азербайджан – тул эл» выставке гоч кундемын моторлыкшым ужаш йӧн лийын. А ӱстембалне могай гына чесым погымо огыл!? Тӱрлӧ пӱкш, кампетке…

Теве эше шекербура, пахлава, бадамбурма, гогал… – палдарыш моткоч чолга ӱдырамаш Рейхан Азизова да мыламат иктым шуялтыш. – Тиде – шекербура.

М-м-м, могай шере. Тӱжвач ончымаште кугече когыльыла коеш, – шоналтышым семынем.

Новрузлан ямдылыме кочкышна чылажат шере. Шекербуран кӧргашыжлан тыгыдемдыме пӱкш ден сакырложашым пыштена, – рашемдыш тудо. – Кажне кочкыш мом-гынат ончыкта. Мутлан, пахлава – шӱдырым, гогал – кечым…

Новрузлан азербайджан калык ожнысекак поян ӱстел чесым ямдылен, йӱлам шуктен. Кызытат йӱлам калык монден огыл да кушкын толшо тукымымат тидлан шӱмаҥда. А тидыже пайремыште лийме годым сайынак шижалте. Тушко кугурак-влак дене пырля йоча-шамычат моткоч шукын погыненыт. Тидын шотышто Марий Элыште азербайджан-влакын национально-культурный автономийышт чот тургыжланен. Ты организацийым ик ият пеле ончыч ыштеныт. Тудым Октай Гусейнов вуйлата.

Вуйлатышын ойлымыж почеш, Марий Элыште азербайджан калык гыч лекше 2800 еҥ ила.

Шукынжо тыште ятыр ий дене илена, тунемаш толшо-влакат улыт. Пандемийлан кӧра икмынярынже Шочмо кундемышкынат каеныт, – палдара Октай Аскерхан-оглы. – Республикыште чыла калык дене келшен илена, сандене пайремышкат нуным ӱжынна, меат уло кумылын нунын деке каена.

Чынжымак, шошо кумылан пайремыште марийжат, рушыжат, татаржат… шукынак лийыныт. Кажныжлан вес калыкын йӱлаже, тӱвыраже нерген пален налаш оҥай лийын. Сценыште азербайджан муро, куштымаш кумылым нӧлтеныт, школышто тунемше-влакын ача-аваштын шочмо кундемышт нерген лудмо почеламутыштат сылнын йоҥгеныт: ӱдыр-влак чон йӱлен, моткоч сайын лудыныт. Залыште шинчыше калык республикысе азербайджан коллектив-влакымат, пайремлан лӱмынак Баку гыч толшо артист-влак ден спортсменымат моткоч шокшын вашлийын…

!!! Умбакыже «Марий Эл» газетыште лудаш темлена 

А.БАЙКОВА

Опубликовать в Одноклассники

Добавить комментарий