Мутна – донор-влак нерген, вет нуным чынжымак илышым арален кодаш полшышо суксо дене таҥасатараш лиеш.
Республикысе вӱрым налме да пуымо станций ончычсо семын мӱкш омартала огеш гӱжлӧ, вет донор-влак тышке ынде келшыше жаплан ончылгоч возалтме почеш толыт да тидым пеш сай йӧн семын палемдат. Нунын кокла гыч иктышт вӱрым йодмо почеш, акций жапыште але оҥайлан пуат да йомыт гын, весышт донор-влакын радамышкышт ӱшанлын шогалыт.
Ӱмаште станцийыште 6 тӱжем наре донацийым ыштыме.
– Теве таче почётан донорна Олег Николаевич Данилов станцийыш 65-ше гана толын. Тиде жапыште тудын деч 44 литр наре вӱрым налынна! Радамынрак палдараш гын, вӱрым – 27 гана, плазмым – 31 гана. Таче тромбоцитым – вӱрын клеткыжым – шымше гана пуа. Тидланже креслыште шагатат пеле наре кияш кӱлеш. Пеш ответственный донор. Нелын черланыше але азапыш логалше иктаж еҥлан вӱр кызытак кӱлмӧ годым эре полша. Тудын гай донор-влакым южгунам пайрем кечылаштат ӱжыкташ логалеш, туге гынат нуно – айдеме илышым утарен кодаш полшышо суксо-шамыч – чыланат пеш скромный улыт, – эртыше кугарнян вашмутланымына годым палдарыш Вӱрым налме да пуымо станцийын донор кадрым чумырымо пӧлкажын вуйлатышыже Татьяна Ильина.
Йошкар-Олаште илыше 43 ияш Олег Даниловат – путырак скромный донор: шкеж нерген кӱчыкын гына каласкалыш, эсогыл пашавержым ыш ончыкто.
Олег ДАНИЛОВ, Российын почётан доноржо:
– Донор-влакын радамышкышт 2013 ийыште шогалынам. Вӱрым налме да пуымо станцийыш паша гыч йолташем-влак дене пырля толынам. Тунам мыланем чылажат оҥайын чучын да тылеч вара вӱрым, плазмым, тромбоцитым сдатлаш тӱҥалынам.
Вӱрым пуымо дене айдеме шканжат, пациентланат пайдам ышта, вет тидын деч вара донорын организмже уэмдалтеш, тыгодымак черлын илышыжым арален кодаш ӱшан шочеш.
Суапле сомылым ыштымем умылем, но тидын дене нимынярат ом кугешне. Вӱрым пуаш жап шумек, станцийыш уло кумылын каем – тиде илыш-йӱлашкем пурен манынат кертам. Ынде вӱрым сдатлыде иленжат ом керт, очыни.
Маргарита ИВАНОВА
Снимкыште: Российын почётан доноржо Олег Данилов.
Татьяна Ильинан фотожо.
