Йошкар-Оласе медицине колледжын студентше-влак поро кумылым ончыктымо тӱрлӧ акцийыш ушнат.
Октябрьыште гына нуно Йошкар-Ола кумдыкышто илалше еҥ ден инвалид-влаклан почмо «Сосновая роща» интернат-пӧртыш окнам мушкаш да телылан шокшемдаш кок гана миеныт.
Тылеч посна Янлык-влакым аралыме тӱнямбал кечын колледж директорын воспитаний паша шотышто советникше Марина Шумекован вуйлатымыж почеш озадыме пий ден пырыс-влаклан кочкышым погымо «Кугу шӱман изи йолташна-влак» акцийым эртареныт.
А теҥгече «Порылыкым – ялыш» всероссийский акцийын кышкарыштыже Звенигово районысо Выльыпсола ялыш миеныт, верысе фельдшер-акушер пунктышто фельдшерын приёмыштыжо шинченыт, пациент-шамычын антропометрический данныйыштым налыныт, вӱрысӧ сакырын, вӱргорно давленийын кугытыштым висеныт, электрокардиограммым ыштеныт, медицине документацийым возеныт, илалше еҥ-влак деке мӧҥгышкышт лектыныт.
Ончыкылык медик-влакым чыла вере куанен вашлийыт да поро кумылышт ден пайдале пашаштлан уло шӱм-чон дене тауштат.
М.ИВАНОВА
Йошкар-Оласе медицине колледжын фотожо
