Марий Эл Тазалык аралтыш министерствылан Российын медицине вузлаштыже 2025-2026 тунемме ийлан 88 целевой верым ойыреныт.
Тидыже отрасльлан икмыняр ий гыч регионысо медицине пашаеҥ-влакын армийыштым самырык специалист-шамыч дене пойдараш сай йӧн, тыгак «Кужу да чолга илыш» национальный проектын «Медицине кадр» регионысо проектшым илышыш пурташ эше ик ошкыл.
Тиде арнян Тазалык аралтыш министерствын да Марий кугыжаныш университетын пашаеҥышт Йошкар-Оласе медицине колледжыште ончыкылык абитуриент-шамыч дене вашлийын мутланеныт.
Министерствын кугыжаныш граждан службо да кадр паша пӧлкажын начальникше Елена Рокина кугурак класслаште тунемше ӱдыр-рвезе-влак ден нунын ача-аваштлан 2025-2026 тунемме ийысе приёмный кампанийын кышкарыштыже целевой направлений дене тунемаш колтымо ойыртем-шамыч дене палдарен да шуко йодышлан вашештен.
Таче целевой наборын сай велже-влак коклаште вузыш тунемаш пураш кугурак ӱшан улмым, стипендийым ешарен тӱлымым, практикым эрташ верым ойырымым, паша верым ямдылымым, институт деч вара ординатурыш ойырен налме специальность дене направленийым пуымым шотлыман.
Марий Элыште Медицине вуз ынде латикымше ий пашам ышта. Тудын выпускникше-влак верысе медицине организацийлаште пашам сайын ыштат. Школым тунем пытарыше ӱдыр-рвезе-влаклан Йошкар-Оласе вузыш тунемаш пураш мо дене пайдале? Тиде йодышлан МарГУ-н ответственный секретарьже Альберт Мамаев радамын вашештен. «Кушто шочынат, туштак кӱлат» аргумент деч посна эше шочмо республикысе университетыште шинчымашым погымо шотышто шуко сай велым палемден.
Тений МарГУ эмлыме факультетыш 42 целевой верым ойырен, педиатрий факультетыш – 13 верым.
Выпускник-влак профессийлан целевой направлений дене моло вузлаштат тунемын кертыт. Тидланже Ижевскысе медицине академий 7 верым ойырен, Чуваш кугыжаныш университет – 18, Казань медицине университет – 5, Киров медицине университет – 3 верым.
Маргарита ИВАНОВА
Марий Эл Тазалык аралтыш министерствын фотожо.
