Йошкар-Оласе 1-ше №-ан поликлинике ден Республикысе коваште-венерологий диспансерын тӱҥалтышышт почеш «ОНКО-СТОП» акций эртаралтеш.
Тудо онкологий дене кылдалтше черым вияҥаш тӱҥалме йыжыҥыштак рашемдымашке виктаралтын. Акций поснак медицине организацийыш шке семын миен кертдыме илалше еҥ ден начарын коштшо граждан-влаклан кӱлешан.
Икымше мероприятий 7 июньышто Йошкар-Оласе Петров уремын 4-ше №-ан пӧрт кудывечыштыже эртен. Тиде кечын 1-ше №-ан поликлиникын медикше-влак 10 гыч 13 шагат марте 44 еҥын коваштыжым, тазыла чоражым да шӧртужым тергеныт. Икмыняр пациентым Республикысе коваште-венерологий диспансерыш келгынрак шымлалташ колтеныт.
Кокымшо мероприятий 14 июньышто Хасанов уремысе 9-ше №-ан пӧрт кудывечыште эртен.
Специалист-влакын шушаш шуматкечын да лишыл жапыште кушко лекташ палемдымыштым Йошкар-Оласе 1-ше №-ан поликлиникын официальный сайтыштыже рашемдаш лиеш.
Маргарита ИВАНОВА
Марий Эл Тазалык аралтыш министерствын фотожо
