Марий Элым вуйлатыше Юрий Зайцев Кужэҥер ден У Торъял районлаште илыше калыкын медицине полыш да здравоохраненийым вияҥдыме шонымаш дене кылдалтше йодышыжлан вашештен.
Тургыжландарыше йодыш-влак Кужэҥер ден У Торъял районласе рӱдӧ больнице-шамычым Шернур районысо рӱдӧ эмлымвер дене ушымо увер шотышто шочыныт. Калыклан умылтареныт: медицине организаций-влакым ушымо дене врач, медсестра да фельдшер-шамычым паша гыч огыт утыктаре, мӧҥгешла, пациент медицине полышым куштылгынрак налаш тӱҥалеш, тыгак больнице ден ФАП-влакын материально-технический базышт саемеш.
Южо медицине пашаеҥ коллективын икоян улмыжым да чыла пашам икшырымын ыштымыжым палемден, сандене нуно ончыкылык вашталтышым лӱдынрак вучат, кеч шукынжо моло эмлымверысе коллегышт дене палыме улыт.
«Ме, врач ден медсестра-влак, ик команде улына. Коллективна могай, тугаяк кодшо манын шонем», – пашаеҥ-влак кокла гыч манын иктыже.
Врач ден кокла медицине пашаеҥ-влакын профессионализмышт да поро кумылышт нерген моктен ойлымым ик гана веле огыл колынам, иктымат огына утыктаре, а реорганизаций утларакше организационный да юридический тат-шамыч дене кылдалтын, тыгодымак пациент-влаклан ешартыш йӧн ден сайрак медицине полыш лийыт, вашештен республикым вуйлатыше.
«Вес коллективыш огыда кай, вес медицине организацийыш огыда кусно. Пашам кузе ыштенда, тугакак ышташ тӱҥалыда. Тендан деке шкендан пациентда-влакак кошташ тӱҥалыт», – ӱшандарен Ю.Зайцев.
Республикым вуйлатыше шуко йодышлан шкеак вашештен, тӱрлӧ кырча-марча нерген тазалык аралтыш министр Марина Панькова каласкален. Йодыш-влак специалистын приёмышкыжо возалтме, медик-шамычлан шуко паша логалме, у кадрым ушымо, яллаште медикаментым ужалыме, льготан препарат ден медицине оборудованийым ситарыме, ФАП-шамычым олмыктымо да чоҥымо дене кылдалтыныт.
Нимогай нарушений ден нелылык огыт лий, ӱшандарен Тазалык аралтыш министерствым вуйлатыше.
Вашлиймаш годым калыклан эмлымвер-влакым ушымо дене медицине полышым кумданрак пуаш, аҥысыр профилян врач-специалист-влакым ушаш, чыла кум тӧнежын куснылшо комплексыштым тора яллаште илыше калыклан профосмотрым эртараш кучылташ йӧн лекме нерген каласкаленыт. Тылеч посна чыла тиде эше пашадарым кугемдаш полша. Тыгак У Торъял больницыште реабилитаций отделенийым почаш палемдыме. Тушто Шернур больницын вӱргорно отделенийже да моло тӧнеж гыч эмлалт лекше пациент-влаклан йол ӱмбак шогалашышт полшат. Кужэҥер больницыште эндоскопический шымлымаш-влакым эртараш тӱҥалыт, тыгак паллиативный медицине полышым пуымо отделенийыште койко чотым кугемдат да черле-влаклан сай йӧным ыштат.
Паша дене мийымыж годым Ю.Зайцев У Торъял посёлкышто Кугу Отечественный сарын участникше-шамычлан шогалтыме шарныктыш воктеке Сталинград кредалмашын геройжо-влакым шарныме лӱмеш пеледышым пыштен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
