Марий Элым вуйлатыше Юрий Зайцев Казаньыште Кыргыз Республикын генеральный консулжо Эрик Бейшембиев дене вашлийын.
Нуно пашам пырля ыштыме да партнёр кылым вияҥдыме радам нерген мутланеныт.
«2024 ийыште Марий Эл гыч Киргизийыш сатум: металл изделийым, оборудованийым, пум, шылым – 30 процентлан шукырак колтымо. Кыргызстан гыч Марий Элыш импортым 36,2 процентлан кугемдыме. Ончыкыжым сату оборотым эшеат кугемдаш палемдена», – манын Юрий Зайцев.
Йолташле элын еҥже-влак республикнан промышленный да ялозанлык предприятийлаштыже лийыныт.
«Программым мыланна лишыл ялозанлык направлений гыч тӱҥалмыланда да, объектыш конден, шочмо напиткынам – кумысым – йӱктымыланда тау», – палемден Эрик Бейшембиев.
А вара Марий Элын бизнес-сообществыжын еҥже-шамыч дене вашлиймаш лийын. Тушто республик-влакын пашам пырля ыштыме кӱлешан направленийже-шамычым лончылымо.
Шолшо точкышто Кыргыз Республикын студентше-шамыч регионнан шинчымашым пуымо организацийлаштыже тыршыше еҥ-влак дене вашлийыныт.
Мучашлан сату оборотым кугемдыме, научно-образовательный да инноваций проектлам вияҥдыме, союзный эл-влак коклаште туризм ден тӱвырам кумдаҥдыме шотышто паша радамым палемденыт,
Марий Элым вуйлатышын пресс-службыжын уверже негызеш Маргарита ИВАНОВА ямдылен.
