Уремыште шогышо мотор игече, жапыштыже толын шушо кугыжаныш субсидий полыш, пашам келшен толшын шуктымаш, тыгак уэмдыме технике ялозанлык пашам палемдыме деч ончыч мучашлаш йӧным ыштеныт.
Тидын нерген Марий Эл вуйлатыше Юрий Зайцевлан республикын ялозанлык да продовольствий министрже Андрей Кондратенко ойлен. Палдарымыж почеш, икияш кушкылым 151 тӱжем утла гектар кумдыкышто але план деч 97 %-ште ӱдымӧ. Ӱмаште тиде жапыште ты паша 88 тӱжем гектарыште але 59 %-ыште ышталтын улмаш.
Кызыт озанлыклаште рапсым, кормалык культурым, пареҥгым, пакчасаскам шындат. Тыгак пестицид дене обрабатыватлыме паша шукталтеш.
Идалык тӱҥалтыш гыч але марте аграрий-влак 250 единице ялозанлык технике ден оборудованийым налыныт. Тидыже ӱмашсе дене таҥастарымаште 170 % лиеш. Ялозанлык производитель-влакын технический паркышт чылаже 662 миллион теҥгелан уэмдалтын.
Марий Эл вуйлатыше озанлыклаште тыршыше-влакым пашам сайын шуктымыштлан тауштен да палемден:
– Тыгай паша лектыш кочкыш йӧрварым ужалыме рынкым кумдаҥдаш, утыжым вес регионлашке колташ йӧным ышта да эрласе кечылан ӱшаным пуа. А кызыт тӱҥжӧ – чыла пасу пашам жапыштыже шукташ да умбакыжат тыгак сайын тыршаш.
Марий Эл вуйлатышын администрацийжын информаций паша пӧлкажын уверже негызеш Л.Камалединова ямдылен
