Марий Элысе 10 врач илыме верым саемдаш 3 миллион теҥге дене налеш.
Регионым вуйлатыше Юрий Зайцев Марий Эл Тазалык аралтыш министерствын коллегийжын кумдаҥдыме заседанийыштыже участвоватлен. Тушто отрасльын 2024 ийыште ыштыме пашажым иктешленыт да шушаш пагытлан задаче-влакым палемденыт.
Тазалык аралтыш министр Марина Панькова докладыштыже тӱҥ цифр-шамычым ончыктен. Национальный проектым илышыш пуртымо жапыште 18 фельдшер-акушер пунктым почмо да куснылшо 11 медицине комплексым налме – чыла тиде тора кундемлаште илыше калыклан медицине полыш дене пайдаланаш сай йӧным ыштен. Тыгак шӱм-вӱргорно черым рашемдаш да эмлаш кызытсе жаплан келшыше 47 оборудованийым налме. Онкочер ваштареш кучедалаш амбулаторный онкологический полышым пуымо кум рӱдерым почмо, кӱлешан 71 оборудованийым налын шындыме. Тылеч посна вич у медицине тӧнежым чоҥымо, шымытым олмыктымо, тыгак 30 автомобильым да 40 оборудованийым налме. Йоча здравоохраненийланат кугу тӱткышым ойырымо: медицине тӧнежлашке 82 оборудованийым налме, Республикысе йоча клинический больницын инфекционный корпусшым чоҥаш тӱҥалме.
Кадр йодыш – посна контрольышто. 187 медик дене «Ялысе доктор» да «Ялысе фельдшер» программе-влак негызеш ойпидышым ыштыме – тидын дене ФАП ден амбулаторийлаште пашаеҥ-шамычым 99 процентлан ситарыме.
2024 ий гыч врач-влак Марий Элым вуйлатышын тӱҥалтышыж почеш илыме верым саемдаш 3 миллион теҥге кугытан социальный выплатым налыт. Эртыше ийын ныл медпашаеҥлан полшымо, тений республикын бюджетше гыч 30 миллион теҥгем ойырымо, да илыме верым ынде 10 врач саемден кертеш.
«Илыме верым саемдаш ойырымо окса тӱҥ задачым шукташ: граждан-шамычын илышыштым арален кодаш да тазалыкыштым эскераш – полша манын ӱшанем. Ме ончыкыжымат Марий Элыште илыше кажне еҥлан сай медицине полыш дене пайдаланаш йӧным ышташ тӱҥалына», – палемден Юрий Зайцев.
Коллегийын заседанийыштыже специальный военный операцийын участникше-влак ден нунын ешыштлан социальный полышын ешартыш мерыже-шамычым ыштыме нергенат мутланеныт. Программын кышкарыштыже 66 военнослужащийлан медицине реабилитацийым эртарыме, 886 еҥлан психологический полышым пуымо, 204 йочалан санаторийлаште эмлалташ путёвкым черет деч посна ойырымо. 2025-2027 ийлаште СВО-н участникше-влаклан медицине велым полшымо у лончым, ты шотыштак льготан эмым ойырымо, пӱйым протезироватлыме да реабилитацийым эртарыме направленийла дене – палемдыме.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
