Марий Элыште кеҥежымсе йоча лагерьыште 21 тӱжем утла икшыве канен.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов республикыште илыше йоча-влакын кеҥеж жапыште канымышт да тазалыкым пеҥгыдемдымышт шотышто йодыш дене ведомство-влак кокласе комиссийын заседанийжым эртарен. Тушто палемден: тазалыкым пеҥгыдемдыме кеҥежымсе кампаний шке радамже дене эрта.
Марий Эл образований да науко министр Лариса Ревуцкаян увертарымыж почеш, регионышто йоча-влаклан канашышт 207 организаций пашам ышта. Тений кеҥеж каныш годым тушто чылаже 25 тӱжем ӱдыр-рвезе кана. А кызытлан 21 тӱжем утла икшыве лийын, тиде чот гыч 13,5 тӱжемже – нелылыкыш логалше-влак, 1258 йоча – СВО-н участникше-влакын ешышт гыч.
Министрын мутшо почеш, «Россий Федероацийын субъектлаштыже 2030 ий марте икшыве-влаклан каныме да тазалыкым пеҥгыдемдыме организаций-шамычым угыч почмаш да нуным вияҥдымаш» программе почеш тений ола деч ӧрдыжтӧ верланыше «Радужный» йоча рӱдерыште кок илыме корпусым чоҥымо да тидлан кӧра эше 500 ӱдыр-рвезылан ешартыш верым ыштыме. Тиде пашалан федеральный бюджет гыч 58,3 миллион теҥгем, республикысе гыч 55,5 миллион теҥгем ойырымо.
Кеҥежымсе кампанийлан ямдылалтме годым Володя Дубинин лӱмеш тазалыкым пеҥгыдемдыме да тунемме рӱдерын медицине пунктшым капитально олмыктымо. Ты пашалан 9,8 миллион теҥгем ойырымо.
Кызытлан республикысе йоча-влаклан канаш да тазалыкым пеҥгыдемдаш йӧным ыштымылан чылаже 177 миллион теҥгем кучылтмо.
Марий Элым вуйлатыше Юрий Зайцев соцкылысе аккаунтыштыжо увертарен: « Ончыкыжым – эшеат шуко вашталтыш. Республикна РФ Просвещений министерствын отборжым эртен, да 2026-2028 ийлаште кок у корпусым чоҥаш, тыгак кум пищеблокым, кок медицине блокым да каныме пӧлем-шамычым олмыкташ палемдыме».
Марий Элым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
