КУЧЕМЫШТЕ

Моторлык салоным петырат мо?

Марий Элыште сатулымо рӱдер ден услуго сферым петырыме нерген пунчалым арням иктешлыме негызеш петырен кертыт, да тиде озанлыкым кучышо субъект вуйлатыше-влакын ответственностьышт дене кылдалтын.

Республикыштына у коронавирус инфекций дене кучедалмашке виктаралтше чарак-влак вийыште улыт, туге гынат эпидемиологический ситуаций ончычсо семынак моткоч начар. Регионын кучемже кызытеш локдауным пуртымо ваштареш, но тудым увертарен кертеш.

1 ноябрьыште Марий Элым вуйлатыше Александр Евстифеев лӱмеш республикын тӱҥ санитарный врачше Светлана Булатова деч предписаний пурен, тушто регионысо Роспотребнадзорым вуйлатыше ресторан, кафе, бар, сатулымо да веселаҥдыме рӱдер, розницыш ужалыше объект, бытовой услугым пуышо организаций-шамычым петыраш темлен.

Марий Элыште локдауным пуртымо йодышым регионым вуйлатышын специальный совещанийыштыже лончылымо да иктешлымашым ик арня гыч ышташ пунчалме. Озанлыкым кучышо субъект вуйлатыше-шамыч ден калык COVID-19 шарлыме ваштареш виктаралтше чарак-влакым шотыш налыт гын, регионыштына у коронавирус инфекций дене черланыме чот иземшаш.  

Эпидемиологический обстановкым саемдаш, калыкын илышыж ден тазалыкшым арален кодаш кӱлеш, но тыгодым бизнесъеҥ-влакынат интересыштым шотыш налде огеш лий, палемден А.Евстифеев.

«31 октябрьыште «Ешартыш чарак-влакым пуртымо нерген» эше ик серыш пурен. Кислород, койко фонд, амбулаторийыште эмлыме йӧн нерген айста эше ик гана мутланена», – темлен регионым вуйлатыше.

Тазалыкым аралыме министр Марина Панькован палдарымыж почеш, Марий Элыште пациент-влакым стационарлашке эмлалташ пыштыме чот иземеш, но черле-шамыч садак моткоч шукын улыт.

«Республикыште ситуций моткоч неле. Эртыше арнян больницылашке сутка еда кокла шот дене 176 еҥым пыштенна гын, кызыт – изиш шагалрак. Туге гынат инфекционный стационарлашке эмлалташ колтымо черле-шамычын чотышт эше моткоч кугу. Рушарнян 113 пациентым налынна, тиде чот эртыше арня деч изирак, но суткалан – кугу. Койко фонд гыч 15 процент ужаш яра, кеч норматив почеш 20 процент лийшаш. Резервым ямдылыме. Ситуаций йоча-влакын черланаш тӱҥалмышт дене нелемеш. Таче кечылан икшыве-шамычым Йоча республиканский больницыш эмлалташ пыштыме чот кугу. Черле-влак ковидный отделенийын чыла койкыштыжо кият. Республикыште черланыше чумыр еҥ гыч 15-18 процент ужаш ковидым пеш нелын чыта. ИВЛ-аппаратыште 62 гыч 69 марте пациент кия», – увертарен М.Панькова.

Марий Элым вуйлатышын COVID-19 дене кучедалаш ешартыш оксам ойырымо нерген пунчалым лукмыжлан кӧра медицине организацийлаште кислород ситышын уло, ешарен министр.

«Кислородын ситыдымыжым ик кечат шижын огынал. Медицине организацийлаште тудо эре ситышын лийын. Ойырымо 15 миллион да моло полыш кӱшеш ме кислородын концентраторжым налынна. Кызыт мемнан 260 утла концентраторна уло», – палемден М.Панькова.

Таче республикыштына чарак-влакым пуртымо але кораҥдыме нерген пунчал граждан ден бизнесъеҥ-шамычын умылымашышт дене чак кылдалтын, манын правительство председательын икымше алмаштышыже Александр Сальников .

«Республик вуйлатышын лукмо кок указыштыжат предприятий ден тӧнеж-влакын пашаштым чарен шогалтыме нерген ой уке. Тиде кажне еҥлан шке оксажым ыштен налаш йӧным ыштымашке виктаралтын. Изи ден кокла предпринимательствын бизнесышт ик ий ончычсо семын шаланышаш огытыл. Элыштына – ковид, но ме тыгодымат илаш да пашам ышташ тунемына. Мемнан дене калыкат, бизнесат азапыш логалшаш огытыл», – палемден тудо.

Марий Элыште ковид дене кылдалтше сай сӱретат уло – вакцинацийым эртыше-влакын чотышт кугемеш.

 «Нылымше толкынышто калык шуко мом умылен. Республикын корнылаштыже арняште ик еҥым йомдаренна гын, ковидлан кӧра – ныллым. Калык ойыртемым ужеш. Сандене республик правительствын общепитын заведенийлашкыже, сатулымо объектлашке еҥ-влакым QR-код деч посна пурташ чарымыжым сай велым палемдыман. Предприятий пашам ыштыже, пашаеҥ-шамыч таза лийышт манын, правительстве пашам пуышо-шамычлан объектыш пурымаште QR-кодым тергаш темла. Вакцинаций нерген эше ик гана мутланыза», – манын А.Сальников.

Марий Элым вуйлатыше А.Евстифеев озанлыкым кучышо субъект вуйлатыше-влаклан чараклыме мере-шамычым шукташ да калыклан вакцинацийын пайдалыкше, санитарно-эпидемиологический мере-влакын кӱлешлыкышт нерген каласкалаш задачым шынден.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

 

Опубликовать в Одноклассники

Добавить комментарий