29 апрельыште Марий Эл Республикын шымше созыв Кугыжаныш Погынжын латшымше сессийже пашам ыштен. Паша радамыште 18 йодыш палемдалтын. Депутат-влак Марий Элын Йошкар-Оласе судебный районын 10-шо номеран судебный участкын мировой судьяжлан уэш лу ийлан Светлана Подоплеловам шогалташ ик ой дене келшеныт, Марий Эл правительстве председательын алмаштышыжлан Ольга Федоровам, ялозанлык да кочкыш министрлан Андрей Кондратенком шогалтыме шумлык йӱкленыт. Россий Федерацийын указше почеш субъектлаште 2023 ий марте Конституционный суд-влакым петыраш палемдыме, депутат-влак ты шотышто Марий Элын законжын проектшым пеҥгыдемденыт. Эн шуко йодыш Марий Эл Республикын тӱрлӧ министерствыжын да ведомствын пашашт дене кылдалтше законлашке вашталтыш-влакым пуртымо нерген лийын. Мучаште Марий Элыште Айдемын праваже шотышто уполномоченный Фанис Мухаметгалиевын 2020 ийыште ыштыме пашаж нерген докладшым колыштыныт.
Палемдыме 18 йодыш гыч иктыже – «Марий Эл Республикын Конституцийышкыже тӧрлатымаш-влакым пуртымашым» вес сессийыште ончаш кусарыме. Вес сессий 2021 ий 1 июльышто эрта.
Л.СЕМЕНОВА.
Фотом Марий Эл Республикын Кугыжаныш Погынын официальный сайтше гыч налме.
