УВЕР ЙОГЫН

«Ме эре пеленда улына»

Республикын кучемже тулык йоча-влакым илышлан ямдылыме пашашке кугу вийым пышта.

Йоча-влакым аралыме тӱнямбал кечын Марий Эл вуйлатышын пашажым жаплан шуктышо Юрий Зайцев Лӱльпан йочапӧртыш миен коштын. Тиде тӧнежым вуйлатыше Надежда Петухова воспитанник-шамычын илыме да тунемме условийышт, кӱкшытышт нерген радамын каласкален.

Лӱльпан йочапӧртыштӧ тулык да ача-ава ончымо деч посна кодшо 7-17 ияш-влакын ныл группышт да школыш коштдымо ийготан-шамычын ик группышт уло. Ӱдыр-рвезе-влак школ программе дене тунеммышт деч посна эше латкок усталык объединений ден секцийыште ешартыш шинчымашым налыт.

Юрий Зайцев ургымо мастерскойышто, тренажер залыште лийын, логопед ден дефектологын, ЛФК кабинет-влакым, илышлан ямдылалтме пӧлемым, тыгак йоча-шамычын малыме верыштым ончен. Воспитанник-влак дене мутланен.

«Пӧртдам ончалын савырнышым. Шижам, келшен иледа. Тӱшка кухньышто, тренажер залыште чыла сай, нуно нигунамат яра огыт шинче. Те конкурслаште чолган участвоватледа, шуко мом ыштен моштеда – кочкаш ямдылен, ӱстембалым сервироватлен, тӱрлен, рвезе-шамыч столяр пашалан тунемыт. Тыланда чыла сайым веле тыланем. Тӱҥжӧ – ончыко ошкылза, цельым шындыза да тушко шуза. Тунемашат ида мондо, молан манаш гын мыняр шуко палет, тунар шуко профессийым налын кертат. А ме эре пеленда улына», – манын Ю.Зайцев.

Марий Эл вуйлатышын пашажым жаплан шуктышо йоча-влаклан спорт инвентарь ден ӱстембал модышым пӧлеклен.

Лӱльпан йочапӧртыштӧ тулык ӱдыр-рвезе-влакым, поснак выпускник-шамычым, илышлан ямдылыме йодышлан кугу тӱткышым ойырат, социально-адаптационный пачерым ончымыж годым палемден Ю.Зайцев.

«Йоча-шамыч мемнан ончыкылыкна улыт. Нуным кумда илыш корныш могайым лукмына дене регионнан да элнан илышышт чак кылдалтын. Тыште ӱдыр-рвезе-влакым патриотизм шӱлышеш воспитатлат, нуным поро шӱм-чонаным ыштат. Тичмаш налмаште, ме «Кугу перемен» гай кызыт улшо проект-влаклан полшена, нуно йочалан элнан тичмаш гражданинже лияш полшат. Мо мемнан дене кылдалтын гын, чыла вережат, бытовой гыч организационный тат-влак марте, участвоватлаш тӱҥалына», – палемден Юрий Зайцев.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий