Звенигово районысо Юлъял селаште илыше 600 утла еҥ пӱртӱс газ дене пайдаланаш тӱҥалын
21 февральыште тыште посёлко-влак кокласе газ пучым чӱктымӧ торжественный церемоний эртен.
Мероприятийыште Марий Элым вуйлатыше Юрий Зайцев, «Газпром межрегионгаз» ООО-н генеральный директоржын алмаштышыже Сергей Табачук, «Газпром межрегионгаз Йошкар-Ола» ООО-н генеральный директоржо – «Газпром распределение Йошкар-Ола» ООО-н организацийжым виктарыше Александр Еремин, Звенигово район администрацийын вуйлатышыже Сергей Петров да Юлъял калык лийыныт.
Газ пучым чоҥымо дене канде тулым 263 суртыш, тыгак тӱвыра пӧрт ден фельдшер-акушер пунктыш пуртымо.
Ю.Зайцев калыкым пайрем дене саламлен да газификацийым Марий Эл правительствын ик эн ончыч шуктымо пашаж семын палемден.
«Таче ялыште илыше-влак деке шергакан огыл, экологий велым яндар канде тул толеш. Правительстве регионым газифицироватлымылан кугу тӱткышым ойыра. Тидым «Газпром» ПАО дене шукертсек ыштыме паша кӱшеш шуктена. 2023 ийыште Юлъялыште 30 километр утла кужыт газ пучым, тыгак шеледыше сетьым шупшмо», – манын тудо.
Ӱмаште Марий Элыште газифицироватлыме кӱкшыт 84 процентыш шуын, тыгодым Россий Федерацийыште тудо 73 процент лийын.
«Газпром» ПАО-н Марий Элыште газоснабжений ден газификацийым вияҥдыме шотышто инвестиционный программыжым илышыш пуртымо кышкарыште 2024 ийыште Звенигово районышто эше кум илемыште 550 утла суртыш канде тулым пурташ палемдыме. Тылеч посна Волжский, Марий Турек, Медведево, Морко, У Торъял да Советский районлаште 67 километр утла газ сетьым шупшшаш да эше 650 суртыш канде тулым пуртышаш улыт.
С.Табачукын палемдымыж почеш, чоҥымо у инфраструктур Юлъялыш канде тулым пурташ йӧным ыштен. Тыгак Россий Федерацийын президентше Владимир Путинын тӱҥалтышыж почеш илышыш пурталтше канде тулым мучаш марте пуртымо программе умбакыже шукталтеш.
Юрий Зайцев ден Сергей Табачук Бронниковмытын ешыштышт лийыныт да кужун вучымо канде тулын толын шумыж дене саламленыт. Тиде пӧртыштӧ посёлко-влак кокласе у газопроводым чӱктымӧ деч вара пӱртӱс газ дене ик эн ончыч пайдаланаш тӱҥалыныт.
Марий Эл Республикым вуйлатышын пресс-службыжын уверже негызеш М.ИВАНОВА ямдылен
