Перинатальный рӱдерын акушерско-физиологический корпусшым шошым капитально олмыктен шуктат.
Ынде ӱдырамаш-шамыч мӱшкыраҥме йыжыҥ гыч аза дене мӧҥгыш колтымо марте йӧнан условийыште лийыт.
Эртыше ийын Йошкар-Олаште Перинатальный рӱдерын кӱкшӧ технологиян у корпусшым почмо да тудын воктен верланыше вич пачашан зданийым олмыкташ тӱҥалме.
Оралтын тӱжвал тӱсшӧ уже вашталтын. Корпус кӧргыштат кугу вашталтыш лиеш. 1-3 веран, туалет да душ пӧлеман палатылаште кочкаш верым келыштарат, у мебельым шындат. Чыла тиде Марий Элым вуйлатыше Юрий Зайцевын тӱткышыжӧ да Россий президент Владимир Путинын полшымыж дене ышталтеш.
– Республиклан тиде моткоч кӱлешан объект, молан манаш гын кӱкшӧ технологиян корпусым почмо деч вара азам ыштыме деч варасе, мӱшкыраҥмашын ситыдымашыже да кызыт гына шочшо азан патологийже отделенийлам олмыкташ кӱлын. Ме тиде йодыш дене регионым вуйлатыше Юрий Викторович Зайцев деке лекна. Россий президент Владимир Владимирович Путин дене мутланымыж годым тудо Марий Эллан Перинатальный рӱдерын зданийжым капитально олмыкташ оксам ойыраш йодын. Проект-смете документаций ден экспертизе лийыныт, да Россий Федерацийын правительствыжын резерв фондшо гыч 264 миллион теҥгем ойыреныт. Тылеч посна, чылажымат санитарный йодмашлан келыштараш, ӱдырамаш-влаклан сай йӧным ышташ манын, Юрий Викторович республикын бюджетше гыч эше 20 миллион теҥгем ойыраш пунчалым луктын, – палдарен регионын тазалык аралтыш министрже Марина Панькова.
Министрын мутшо почеш, чыла пашам апрель марте ыштен шукташ палемдыме.
Капитально олмыктымо корпусышто чыла йӧн тӱнямбал практикыште кучылталтше стандарт-влаклан келшыше лиеш. Ава-шамычлан событий торжественный да ушеш кодшо лийже манын, азам мӧҥгыш ужатыме залымат моторым ыштат.
Вашталтыш-влак нерген утларак радамын Перинатальный рӱдерын тӱҥ врачше Ирина Виноградова каласкален. Мутшо почеш, визымше пачашыште азан патологийже отделений лиеш, тыште жап деч ончыч шочшо йоча-шамычым медперсонал дене пырля ава-влакат ончен лукташ тӱҥалыт. Икымше, кокымшо да нылымше пачашлаште азам ыштыме деч варасе отделений-влакым оборудоватлат.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
